Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 338 Hüküm no: 409 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pekmezci Mehmed b. Abdullah ile diğer Mehmed b. Abdullah’ın ortaklıklarını bitirdikten sonra tekrar anlaşarak ortak olmaya karar verdikleri Ma‘rûz Pekmezci esnâfından olup merhûm el-Hâc Davud nâm sahibü’l-hayrın vakfı müstagallâtından derûn-ı arzuhâlde mezkûr Ayazmakapısı hâricinde vâki‘ lede’l-ahâlî ma‘lûmü’l-hudûd mahzen ve derûnunda gedik ta‘bîr olunur mevcûde âlât-ı ma‘lûmeye bi’l-münâsafa mutasarrıflar olan arzuhâlde mezkûrü’l-ism Mehmed b. Abdullah şerîki sahib-i arzuhâl diğer Mehmed b. Abdullah nâm kimesneyi meclis-i şer‘-i envere ihzâr ve mütevellî-i vakf-ı mezbûr Derviş el-Hâc Abdülhalim ile Bakkāllar pazarbaşısı vekîli Ahmed Bölükbaşı hazır oldukları hâlde terâfu‘larında mezbûr diğer Mehmed şerîki merkūm Mehmed ile mahzen-i mezkûrda üç sene-i kâmile şerîkler olup hâlâ fesh-i akd-i şirket eyleyip hesâb ve kitâblarını kethudâları ve ihtiyâr ustaları ma‘rifetleriyle görüp kat‘-ı nizâ‘ eylediklerinden sonra sahib-i arzuhâl diğer Mehmed mahzen-i mezkûru taksîm murâd etmekle mahzen-i mezkûr kābil-i taksîm olmadığını mütevellî-i vakf-ı mezbûr ve bî-garaz Müslimîn haber vermeleriyle mârrü’z-zikr mahzen ve derûnunda mevcûde âlât-ı ma‘lûmesini yine bi’l-münâsafa zabt u tasarruf etmek üzere beynleri tevkīf ve ıslâh olundukda mezbûrlar dahi râzılar olup ol vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 23 Şevval sene 1162