Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 339 Hüküm no: 410 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayseri’nin Tavsun köyünden Marat oğlu Artin’in, köy ahalisinin vekili sürgünde olan Mehmed Emin Efendi’nin serbest bırakılması için köylünün sarfettiği paranın kendisine teslimi talebiyle Norsiz, Karabet ve Baryam’a açtığı davanın reddedildiği Ma‘rûz Medîne-i Kayseriye’ye tâbi‘ Tavsun nâm karye ahâlîsinden arzuhâl sahibi Marat oğlu Artin zimmî meclis-i şer‘de derûn-ı arzuhâlde mezkûr Norsiz ve Karabet ve Baryam zimmîler muvâcehelerinde karye-i merkūme a‘yânından menfî Mehmed Emin Efendi’nin ıtlâkı için târih-i i‘lâmdan üç ay mukaddem mezbûrûn Norsiz ve Karabet ve Baryam bin beş yüz guruş sarf eyledik meblağ-ı mezbûru ahâlî-i karyeden cem‘ ve tahsîl ve karye-i merkūmede sâkin merkūm Norsiz’in oğlu Vartan zimmîye teslîm edin deyü karye-i mezbûre ahâlîsine mektûb irsâl etmeleriyle onlar dahi meblağ-ı mezbûru cem‘ ve tahsîl ve merkūm Vartan’a teslîm etmişler hâlâ karye-i mezbûre ahâlîleri merkūmların emirlerine binâen meblağ-ı mezbûru mezbûrûndan taleb ve da‘vâ ve ahz u kabza ve kendilere îsâle taraflarından beni cümlesi vekîl etmeleriyle binâenaleyh meblağ-ı mezbûru mezbûrûndan bi’l-vekâle taleb ederim deyü da‘vâ eyledikde müdde‘î-i mezbûr Artin kavm-i mahsûr olmayan ahâlîsinin kendi isimlerini ve dedeleri isimlerini ve herbiri ne mikdâr akçe verdiklerini bir vechile beyâna ve tashîhe kādir olmamağla müdde‘î-i mezbûr Artin zimmînin da‘vâsına iltifât olunmadığı Mahkeme-i Bâb’da tescîl ve huzûr-ı âlîlerine i‘lâm olundu el-emrü li-men-lehu’l-emr. Fî 26 Şevval sene 1162