Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 341 Hüküm no: 413 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun bt. Salih’in, mehir ve nafaka bedelinden alacağı olduğu iddiasıyla kendisini boşayan kocası Ali Ağa b. Yusuf’a açtığı davada haksız bulunduğu Ma‘rûz Sahibe-i arzuhâl Şerife Âişe Hatun bt. Salih zâtı ba‘de’t-ta‘rîfi’ş-şer‘î dîvân-ı âlîlerinde ma‘kūd meclis-i şer‘de zevc-i mutallıkı Ali Ağa b. Yusuf ile terâfu‘larında mezbûr zevcim olup târih-i i‘lâmdan iki ay mukaddem beni tatlîk etmekle zimmetinde mütekarrer ve ma‘kūdün-aleyh dört bin beş yüz akçe mehr-i müeccel ve kezâlik mehr-i mu‘accel olmak üzere ma‘kūdün-aleyh üç yüz guruş kıymetli bir câriye ve mecmû‘u iki yüz üç guruş kıymetli ber-mûceb-i defter eşyâ-i ma‘lûme ve nafaka-i iddet-i mu‘ayyene-i ma‘lûme hakkımı mezbûrdan taleb ederim deyü ba‘de’d-da‘vâ ve’s-suâl mezbûr Ali Ağa müdde‘iye-i merkūmenin ber-minvâl-i muharrer zevce-i mutallakası olduğunu ikrâr lâkin mehr-i mu‘accel olmak üzere müdde‘âsını bi’l-külliye inkârından mâ‘adâ merkūme Şerife Âişe’yi tatlîk eylediğimde zimmetimde mütekarrer ve ma‘kūdün-aleyh otuz guruş bir rub‘ mehr-i müeccelini tamamen merkūmeye edâ ve teslîm ve bir hamam sileceği ve bir peştemal dahi verip nafaka-i iddet-i mu‘ayyenesine ve meûnet-i süknâsına ve ibtidâ-i zevciyetden târih-i mezbûra gelince beynimizde cereyân eden hukūk-ı zevciyete ve gayra müte‘allika âmme-i da‘vâdan zimmetimi ibrâ-i âm ile ibrâ ve ıskāt etmişidi deyü eylediği def‘ini udûlden olan Molla Halil ve Bektaş nâm kimesneler şehâdetleriyle merkūme Âişe muvâcehesinde vech-i şer‘î üzere ba‘de’l-isbât merkūme Şerife Âişe dahi def‘-i meşrûhu mukırre ve mu‘terife olmağın mûcebince merkūme Âişe mezbûr Ali Ağa’ya bî-vech mu‘ârazadan men‘ olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 26 Şevval sene 1162