Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 340 Hüküm no: 412 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suyolcular Andreya v. Sava ile ortağı Kosta v. Dimo’nun suyolu tamirinden alacak iddiasıyla İstanbul cizyedarı Mehmed Ağa b. Hasan Ağa’ya açtıkları davada sulh oldukları Ma‘rûz Suyolcu tâifesinden arzuhâl sahiblerinden Andreya v. Sava zimmî kendiden asâleten ve şerîki Kosta v. Dimo zimmî tarafından husûs-ı âti’z-zikre vekîl olduğu Mehmed Çelebi b. Süleyman nâm kimesne ile merkūm Kosta’nın karındaşı Hristo v. el-mesfûr Dimo şehâdetleriyle sâbit olmağla vekâleten meclis-i şer‘-i enverde arzuhâlde mezkûr İstanbul cizyedârı Mehmed Ağa b. Hasan Ağa tarafından husûs-ı âti’z-zikri tasdîka vekîl-i sâbitü’l-vekâlesi olan İbrahim Efendi b. Mehmed muvâcehesinde müvekkil-i mezbûr Cizyedâr Mehmed Ağa’da derûn-ı arzuhâlde mezkûr olduğu üzere suyolu ta‘mîri ücretinden bâkī kalan asâleten ve vekâleten yüz elli cedîd guruş müdde‘âmızdan bâ-vesâtet-i muslihîn müvekkil-i mezbûr Mehmed Ağa ile elli beş guruş bedel-i makbûza sulh olup mâ‘adâsına müte‘allika âmme-i da‘vâdan müvekkil-i mezbûr Mehmed Ağa’nın zimmetini asâleten ve vekâleten ibrâ ve ıskāt eyledim deyü olan ikrârını vekîl-i mezbûr İbrahim Efendi’nin tasdîk eylediği Mahkeme-i Bâb’da tescîl ve huzûr-ı âlîlerine i‘lâm olundu fermân men-lehu’l-emrindir. Fî 26 min-Şevvali’l-mükerrem sene 1162