Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 343 Hüküm no: 417 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’nın, İbrahim b. Abdullah’da kalan borcunu kefili olan oğlu Halil Beşe’nin ödemesine yapılan tenbih Ma‘rûz Mahmiye-i İstanbul’da Firuzağa mahallesi sâkinelerinden sahibe-i arzuhâl Hadîce bt. Mustafa zâtı ba‘de’t-ta‘rîfi’ş-şer‘î meclis-i şer‘de derûn-ı arzuhâlde mezkûr Halil Beşe b. İbrahim muvâcehesinde mezbûr Halil Beşe’nin babası gāib ani’l-meclis İbrahim b. Abdullah nâm kimesne bundan akdem yedimden iktirâz eylediği yüz guruşun altmış üç buçuk guruş yirmi akçesini bana edâ ve teslîm edip zimmetinde bâ-temessük bâkī kalan otuz altı guruş kırk akçeye mezbûr Halil Beşe bi’l-emr ve’l-kabûl kefîl olmağla meblağ-ı mezbûru kefâletine binâen mezbûr Halil Beşe’den taleb ederim deyü ba‘de’d-da‘vâ ve’l-inkâr müdde‘iye-i mezbûre Hadîce Hatun müdde‘âsını ahrâr-ı ricâl-i Müslimînden lede’t-tezkiye şehâdetleri makbûle olan es-Seyyid Mehmed b. es-Seyyid İsa ve İbrahim b. Ahmed şehâdetleriyle mezbûr Halil Beşe muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı bâkī-i mezkûr otuz altı guruş kırk akçeyi müdde‘iye-i mezbûre Hadîce Hatun’a edâ ve teslîmle mezbûr Halil Beşe’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 27 min-Şevvali’l-mükerrem sene 1162