Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 343 Hüküm no: 418 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Ali b. İbrahim’in varislerinden oğlu Halil’in, tereke ve şekerci dükkânındaki aletler ve hasıl olan kazançlardaki hissesini kardeşleri Mehmed ve İsmail’den sulh yoluyla alarak zimmetlerini ibra ettiği Ma‘rûz Derûn-ı arzuhâlde mezkûr müteveffâ Şekerci Ali b. İbrahim’in verâseti sulbî kebîr oğulları İsmail ve Mehmed ve sahib-i arzuhâl Halil’e ba‘de’l-inhisâr mezbûr Halil meclis-i şer‘de karındaşları mezbûrân Mehmed ve İsmail muvâcehelerinde babamız müteveffâ-yı mezbûrun arzuhâlde mezkûr şekerci dükkânında olan şekerci âlâtından ve babamızın fevtinden sonra târih-i i‘lâma gelince karındaşlarım mezbûrân ile şirketimizden hâsıla olan nemâdan ve sâir terekesinden hisse-i irsiyemi mezbûrândan taleb ve da‘vâya tesâddî eylediğimde onlar dahi babamız düyûnu terekesinden ezyed olduğu hâlde vefât etmişidi demeleriyle beynimizde ba‘de’l-münâza‘a bâ-vesâtet-i muslihîn da‘vâ-yı mezkûrumdan karındaşlarım mezbûrân ile nukūdda olan hissemden ezyed bi-tarîkı’t-tehârüci’ş-şer‘î yetmiş guruş üzerine sulh eylediklerinde ben dahi sulh-ı mezkûru ba‘de’l-kabûl bedel-i sulh-ı mezkûrun elli guruşunu mukaddemâ Şekerci el-Hâc Mehmed yedinden ahz bâkī yirmi guruşunu dahi hâlâ karındaşlarım mezbûrân yedlerinden ahz u kabz eyleyip fîmâ-ba‘d babam müteveffâ-yı mezbûrun dükkân-ı mezkûrda olup gedik ta‘bîr olunan şekerci âlâtına ve husûs-ı şirkete ve sâir terekesine müte‘allika âmme-i da‘vâdan karındaşlarım mezbûrânın zimmetlerini ibrâ ve ıskāt eyledim deyü olan ikrârını karındaşları mezbûrân Mehmed ve İsmail dahi tasdîk eyledikleri Mahkeme-i Bâb’dan huzûr-ı âlîlerine i‘lâm olundu. Fî 28 Şevval sene 1162