Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 351 Hüküm no: 434 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in, hizmetini gördüğü Ayşe bt. Cafer’de olan hizmet bedelini sulh yoluyla tahsil ettiği Ma‘rûz Sahibe-i arzuhâl Fâtıma bt. Mehmed nâm bikr-i bâliğa zâtı Ahmed Çelebi b. Hasan ve Mustafa Ağa b. Ali ta‘rîfleriyle mu‘arrefe oldukdan sonra meclis-i şer‘-i hatîrde derûn-ı arzuhâlde mezkûreti’l-ism Âişe bt. Cafer nâm hatun mahzarında ücret ile hizmet eder makūlesinden olmamla talebiyle mezbûre Âişe Hatun’a beş sene hâl-i sıgārımda hizmet etmişidim hâlâ sinîn-i mezkûrede olan hizmetimin ecr-i mislini mezbûre Âişe Hatun’dan taleb ederim deyü tesâddî eylediğim da‘vâmdan bâ-vesâtet-i muslihîn on guruş bedel-i makbûza sulh olup sinîn-i mezkûrede olan hizmetimin ecr-i misline müte‘allika âmme-i da‘vâdan mezbûre Âişe Hatun ile dâmadı işbu Ahmed Çelebi’nin zimmetlerini ibrâ ve ıskāt eyledim deyü olan ikrârını mezbûrân dahi tasdîk eyledikleri Mahkeme-i Bâb’dan huzûr-ı âlîlerine i‘lâm olundu. Fî 4 min-Zilka‘de sene 1162