Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 368 Hüküm no: 462 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahıskalı Hacı Ahmed Bey kızı Pakize Hanım’a intikal eden Hoca Halil Attar mahallesindeki evdeki üç hisseyi zapteden Mehmed Yazıcı b. Mustafa’nın hisselerini Pakize Hanım’a teslim etmesi Bâ-mühr-i hazret-i efendi, Pakize Hanım’ın üç sehim menzil Ma‘rûz Ahıska eyâletinde Namrevan sancağında Tebkir nâm kasaba ahâlîsinden iken bundan esbak fevt olan el-Hâc Ahmed Bey b. Osman Bey b. Hasan Paşa’nın ve müteveffâ-yı mezbûrdan sonra müte‘âkiben fevt olan sulbî sagīr oğulları Abdurrahman Bey ve Abdullah Bey’in hasran vârisesi olduğu Osman Ağa b. el-Hâc Ali Ağa ve Süleyman Çelebi b. Abdullah şehâdetleriyle mahzar-ı hasm-ı câhid-i şer‘îde sâbit ve sübûtuna hükm-i şer‘î lâhık ve müteveffâ-yı evvel-i mezbûr el-Hâc Ahmed Bey’in sulbiye kebîre kızı olup zâtı şâhidân-ı mezbûrân ta‘rîfleriyle mu‘arrefe olan sahibe-i arzuhâl Pakize Hanım meclis-i şer‘-i şerîf-i enverde zikri âtî menzile vaz‘-ı yedi sâbit olan Mehmed Yazıcı b. Mustafa ile terâfu‘larında işbu mezbûr Mehmed Yazıcı’nın yedinde olup İstanbul’da Unkapanı dâhilinde Hoca Halil Attar mahallesinde vâki‘ etrâfı Haremeynü’ş-şerîfeyn vakfından Arpacı el-Hâc Mehmed tasarrufunda olan menzil ve Hallâc Osman zevcesi menzili ve câmi‘-i şerîf cidârı ve tarîk-ı âm ile mahdûd fevkānî ve tahtânî büyût-ı adîde ve hamam ve kârgir mahzeni ve müştemilât-ı sâireyi hâvî mülk menzilin dört sehimden üç sehm-i şâyi‘i babam müteveffâ-yı mezbûrun ile’l-vefât yedinde ırsen ve şirâen mülk ve hakkı olup ba‘de vefâtihî bana ve karındaşlarım mezbûrâna bi’l-irsi’ş-şer‘î isâbet ve intikāl ettikden sonra mezbûrân dahi müte‘âkiben fevt olmalarıyla verâsetleri bana münhasıra olmağla menzil-i mezkûrun dört sehim i‘tibârıyla üç sehm-i şâyi‘i benim ırsen mülk ve hakkım olmuş iken mezbûr Mehmed Yazıcı bi-gayr-ı hakkın vaz‘-ı yed eder suâl olunup kasr-ı yedine tenbîh-i şer‘î olunmak matlûbumdur deyü ba‘de’d-da‘vâ ve’s-suâl mezbûr Mehmed Yazıcı cevâbında ber-minvâl-i muharrer menzil-i mezkûrun üç sehm-i şâyi‘i müteveffâ-yı mezbûr el-Hâc Ahmed Bey’in hayatında yedinde mülk ve hakkı olup ba‘de vefâtihî vârislerine vech-i meşrûh üzere intikālini ikrâr lâkin işbu yedimde olan bin yüz elli bir senesi Cumâdelâhıre’si târihiyle müverrah ve ol târihde Ahıska kādısı olan es-Seyyid Ali Efendi imzâsıyla mümzât ve hâtemi ile mahtûm hüccet mûcebince işbu Pakize Hanım’ın vekîl-i şer‘îsi el-Hâc Veli b. Abdullah ve sagīrân-ı mezbûrânın vasîleri el-Hâc İbrahim bi’l-irsi’ş-şer‘î mülkleri olan menzil-i mezkûrun üç sehm-i şâyi‘ini cümle tevâbi‘ ve levâhıkı ile tarafeynden îcâb ve kabûlü hâvî bey‘-ı kat‘î-i şer‘î ile ol târihde Ahıska vâlîsi olan merhûm Vezîr Yusuf Paşa’ya bin üç yüz guruş semen-i makbûza bey‘-ı bât-ı sahîh-i şer‘î ile bey‘ edip ol dahi ber-minvâl-i muharrer ba‘de’l-iştirâ gāib ani’l-meclis Çukadâr el-Hâc İsa’yı tarafımdan bâ-hüccet şirâya vekîl ettiğime binâen ol dahi bi’l-vekâle yine bin üç yüz guruş semen-i medfû‘a benim için iştirâ ve tesellüm ve temellük ve kabz ve kabûl edip hâlâ yedimde ol vechile mülk-i müşterâmdır deyü ba‘de’d-def‘ ve’s-suâl ve’l-inkâr mezbûr Mehmed Yazıcı def‘-i mezkûrunu bir vechile beyâna kādir olmayıp tahlîfe dahi tâlib olmamağla menzil-i mezkûrun dört sehim i‘tibârıyla üç sehm-i şâyi‘inden kasr-ı yed ve müdde‘iye-i mezbûreye teslîme mezbûr Mehmed Yazıcı’ya tenbîh-i şer‘î olunduğu huzûr-ı âlîlerine i‘lâm olundu. Fî 28 Zilka‘de sene 1162