Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 370 Hüküm no: 464 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun bt. Mustafa’nın, kocası Hüseyin Beşe b. Mustafa ile boşanıp birbirlerinin zimmetlerini ibra ettikleri Ma‘rûz Derûn-ı arzuhâlde mezkûreti’l-ism olup zâtı babası Mustafa b. Mehmed ve İbrahim b. diğer Mehmed ta‘rîfleriyle mu‘arrefe olan Zeyneb Hatun bt. mezbûr Mustafa meclis-i şer‘de zevc-i gayr-ı dâhili arzuhâl sahibi Hüseyin Beşe b. Mustafa’dan mukaddemâ mehr-i mu‘acceli olmak üzere ahz u kabz eylediği yirmi altı guruşu meclis-i şer‘de mezbûr Hüseyin Beşe’ye ba‘de’t-teslîm ve’l-ahz dört bin akçe mehr-i müeccelinin nısfı olup kable’d-duhûl lâzım gelen iki bin akçe mehr-i müecceli ve sahibi olmak üzere kendiye medfû‘u olan iki sandığı mezbûr Hüseyin Beşe’ye vermek üzerine hul‘ oldukda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i da‘vâdan herbiri âharın zimmetini ibrâ ve ıskāt eylediği mübâşirleri Mehmed Çavuş kulları ile Mahkeme-i Bâb’dan huzûr-ı âlîlerine i‘lâm olundu. Fî 29 Zilka‘de sene 1162