Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 370 Hüküm no: 465 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedik Paşa mahallesinde vakıf evin mutasarrıfı Tüccar Karabet’in yoldan bir miktar yeri evine ithal ettiği tespit edilmesiye bu yeri geri yola vermeyi ve inşa edeceği eve şehnişn ve pencere yaptıracağında mahallelinin iznini almayı taahhüt ettiği Bâ-mühr-i hazret-i efendi Ma‘rûz Fermân-ı âlîlerine imtisâlen kıbel-i şer‘den irsâl olunan keşif nâibimiz İbrahim Efendi hâssa mi‘mârı hulefâsından Hüseyin ve Ali ile arzuhâlde mezkûr Gedik Paşa mahallesinde Davud Çavuş Vakfı olan odalarda vâki‘ tarîk-ı hâsda münâza‘un-fîh olan mahalle varıp cerîdede mazbûtü’l-esâmî Müslimîn huzûrlarında akd eylediği meclis-i şer‘de ashâb-ı arzuhâlden Asvador nâm zimmî derûn-ı arzuhâlde ismi mezkûr Tüccâr Karabet nâm zimmî muvâcehesinde mütevellî-i vakf hazır olduğu hâlde zimmî-i mesfûrun vakf-ı mezkûrdan bi’l-icâreteyn tasarrufunda ma‘lûmü’l-hudûd işbu mu‘âyene olunan bir bâb menzilin tarîk-ı hâs cânibinden ba‘de’l-mesâha terbî‘an dokuz zirâ‘ arsa tarîk-ı hâsdan iken merkūm Karabet fuzûlî zabt ve menziline idhâl ve tarîk-ı hâssımızı tazyîk etmişdir deyü bundan akdem ben ve işbu tarîk-ı hâs ahâlîsinden hâzırûn bi’l-meclis müseccelü’l-esâmî kimesneler da‘vâya tesâddî eylediğimizde merkūm Karabet dahi mârrü’z-zikr arsadan tûlen altı ve arzen nısf zirâ‘ mahâllini ifrâz ve tarîk-ı hâssa zam ve ilhâk ve bâkī kalan arsa üzerine binâ murâd eyledikde bizim iznimiz olmadıkca şehnişîn ve pencere ihdâs etmemek üzere merkūm Karabet ta‘ahhüd ve bi’t-terâzî beynimiz bu vechile tevfîk olunup ve kat‘-ı nizâ‘ eyledik dediklerini ba‘de’t-tasdîkı’ş-şer‘î vâki‘-i hâli mevlânâ-yı mezbûr mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ ve takrîr eylediği huzûr-ı âlîlerine i‘lâm olundu. Fî 25 Zilka‘de sene 1162