Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 373 Hüküm no: 469 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zupiçe bt. Yani’nin muhâlaa yoluyla kocası Kosti v. Nikola’dan boşandığı Ma‘rûz İstanbul’da Ayvansaraykapısı dâhilinde Mustafa Paşa-yı Atîk mahallesi mütemekkinelerinden Zupiçe bt. Yani v. Ostoyko nâm zimmiye tarafından husûs-ı âti’z-zikri ikrâra vekîl olduğu zât-ı mesfûreyi ârifân Kürkçü Yorgi v. Foti ve Londari v. Yani nâm zimmîler şehâdetleriyle sâbit olan Vasilaki v. Manol zimmî meclis-i şer‘-i enverde müvekkile-i mesfûrenin zevc-i dâhili olup arzuhâlde mezkûrü’l-ism olan Kosti v. Nikola zimmî muvâcehesinde müvekkilem mesfûre Zupiçe zimmiye zevcim merkūm Kosti ile beynlerimizde hüsn-i mu‘âşeretlerimiz olmamağla zevcim merkūm Kosti’den cihet-i karzdan matlûb ve müdde‘âsı olan yüz on guruş mutâlebesinden fâriğa olmak üzere muhâla‘a olduğumda zevcim merkūm dahi hul‘-ı mezkûru ba‘de’l-kabûl hukūk-ı zevciyete ve târih-i i‘lâma gelince beynlerimizde cârî olan cemî‘ ahz u i‘tâya müte‘allika âmme-i da‘vâdan herbirimiz âharın zimmetini ibrâ ve ıskāt eyledik dedi deyü vekîl-i mesfûrun bi’l-vekâle olan ikrârını zevc-i merkūm Kosti zimmînin tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî-gurreti Zilhicce sene 1162