Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 372 Hüküm no: 468 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Süleyman’ın üç talakla boşadığı hanımı Hoca Rukiye Hatun bt. Yusuf’a olan mehir borcunu ödemesine yapılan tenbih Ma‘rûz Mahmiye-i İstanbul’da el-Hâc Ahmed mahallesi sâkinelerinden sahibe-i arzuhâl Meryem bt. Hacı Abdurrahman b. Hacı Mansur nâm hatun tarafından husûs-ı âti’z-zikri da‘vâya vekîl olduğu zât-ı mezbûreyi bi’t-ta‘rîfi’ş-şer‘î ârifân Müezzin Mehmed Hoca b. İbrahim ve Mehmed Ağa b. Mehmed nâm kimesneler şehâdetleriyle sâbit olan Hâcce Rukiye Hatun bt. Yusuf meclis-i şer‘-i enverde müvekkile-i mezbûrenin zevc-i dâhili olup derûn-ı arzuhâlde mezkûr Süleyman b. Süleyman nâm kimesne mahzarında târih-i i‘lâmdan iki gün mukaddem ve Cumartesi günü müvekkilem mezbûre Meryem Hatun’un zevci işbu mezbûr Süleyman ile beynlerinde hüsn-i mu‘âşeretleri olmadığından esnâ-i müşâcerelerinde zevci mezbûra sen benim küfüvvüm değilsin deyü olan hitâbında zevci mezbûr Süleyman cevâbında zevcesi müvekkilem mezbûreye benden üç talâk boş ol deyü mugallazan tatlîk etmekle müvekkilem mezbûrenin zevc-i mutallıkı mezbûr Süleyman zimmetinde mütekarrer ve ma‘kūdün-aleyh olan yüz elli guruş mehr-i müeccelini bi’l-vekâle taleb ederim deyü ba‘de’d-da‘vâ ve’s-suâl mezbûr Süleyman cevâbında fi’l-vâki‘ müvekkile-i mezbûre Meryem Hatun yüz elli guruş mehir tesmiyesiyle zevce-i menkûha-i medhûlün-bihâsı olduğunu ikrâr lâkin ber-vech-i muharrer tatlîkını inkâr etmeğin vekîl-i müdde‘iye-i mezbûre bi’l-vekâle müdde‘âsını ahrâr-ı ricâl-i Müslimînden mahmiye-i mezbûrede Samatya’da Hatuniye mahallesinde Ağa Hamamı kurbü sâkinlerinden es-Seyyid Ali Çelebi b. es-Seyyid Süleyman ve Mehmed Çelebi b. Mustafa nâm kimesneler şehâdetleriyle zevc-i mezbûr Süleyman muvâcehesinde vech-i şer‘î üzere isbât eyledikde şâhidân-ı mezkûrân mahallerinden ba‘de’t-tezkiye şehâdetleri makbûle olmağın mûcebiyle ba‘de’l-hükm mârrü’z-zikr yüz elli guruş mehr-i müecceli müvekkile-i mezbûreye edâ ile zevc-i mezbûr Süleyman’a tenbîh olunduğu mübâşirleri Muhtâr Çavuş kulları ile Mahkeme-i Bâb’dan huzûr-ı âlîlerine i‘lâm olundu. Fî 29 Zilka‘de sene 1162