Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 374 Hüküm no: 471 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zafiri v. Panayot’un astar bedelinden Bogasıcı Hüseyin b. Osman’a olan borcunu ödemesine yapılan tenbih Ma‘rûz Sahib-i arzuhâl Bogāsıcı Hüseyin b. Osman meclis-i şer‘de arzuhâlde mezkûrü’l-ism Zafiri v. Panayot zimmî muvâcehesinde bundan akdem bin yüz altmış bir senesi Muharrem’i gurresinde mahmiye-i İstanbul’da Kebeciler Hanı’nda vâki‘ sâkin olduğum odamda herbiri birer guruşa olmak üzere merkūm Zafiri yedimden iştirâ ve kabz eylediği kırk beş top beyaz astar semeninden zimmetinde kırk beş guruş hakkım olmağla taleb ederim deyü ba‘de’d-da‘vâ ve’l-inkâr mezbûr Hüseyin ber-vech-i muharrer müdde‘âsını lede’t-tezkiye adâletleri zâhir olan es-Seyyid Ahmed b. es-Seyyid Hüseyin ve Süleyman b. Receb şehâdetleriyle merkūm Zafiri muvâcehesinde vech-i şer‘î üzere isbât etmeğin mûcebince meblağ-ı mezbûr kırk beş guruşu mezbûr Hüseyin’e edâ ve teslîme mezbûr Zafiri zimmîye tenbîh olunduğu mübâşirleri Mehmed Çavuş kulları ile Mahkeme-i Bâb’dan huzûr-ı âlîlerine i‘lâm olundu. Fî 2 Zilhicce sene 1162