Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 375 Hüküm no: 472 Orijinal metin no: [60b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’in, çocuğu Hatice’nin biriken nafaka bedelini boşandığı kocası Mehmed Beşe’den taksitler halinde almak üzere anlaştığı Ma‘rûz Zâtı ta‘rîf-i şer‘î ile mu‘arrefe olan Âişe bt. Hüseyin nâm hatun Kullukçu Mehmed Beşe mübâşeretiyle ihzâr-ı şer‘ ettirdiği zevc-i sâbıkı Hacı Mehmed Beşe muvâcehesinde mezbûr Mehmed Beşe’nin firâşından hâsıla ve benden mütevellide hâlâ hacr u terbiyemde olan işbu sagīre kızım Hadice’ye yedimdeki hüccet-i şer‘iye mantûkunca takdîr olunan yevmî üçer para nafaka-i mefrûzadan târih-i i‘lâma gelince on yedi ay sekiz günde müctemi‘ olan otuz dokuz guruşun dokuz guruşunu bana edâ ve bâkī otuz guruş hakkım zimmetinde bâkī kalmağla taleb eylediğimde mezbûr Mehmed Beşe’nin def‘aten edâya iktidârı olmamağla târih-i i‘lâmdan beher şehr birer guruş verip otuz ay tamamına değin deyn-i bâkī-i [61a] mezkûru tamamen edâ etmek üzere taksît eylediğimde mezbûr Mehmed Beşe dahi ba‘de’l-kabûl beher şehr meblağ-ı mukāssatı şehriye doksanar para ile ma‘an üçer guruş birer rub‘ guruş vermek üzere ta‘ahhüd edip bu vechile kat‘-ı nizâ‘ eyledik deyü on [olan] ikrârını mezbûr Mehmed Beşe dahi tasdîk eylediği Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî-gurreti Zilhicceti’ş-şerîfe sene 1162