Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 379 Hüküm no: 479 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun ve kızı Ümmügülsüm ile Hatice bt. Abdullah ve kızı Ayşe’nin ortak oldukları evde münâvebeten kalacaklarından evde oturan Hatice ve kızı Ayşe’nin evi boşaltıp nöbet sırası gelen Zeyneb Hatun ile kızı Ümmügülsüm’e teslim etmeleri Ma‘rûz Sahibe-i arzuhâl Zeyneb Hatun kendiden asâleten ve sadriye sagīre kızı Ümmügülsüm’ün kıbel-i şer‘den mansûb vasîsi olmağla vesâyeten meclis-i şer‘de derûn-ı arzuhâlde mezkûreti’l-ism Hadîce bt. Abdullah nâm hatunun zevci ve tarafından husûs-ı âti’l-beyâna vekîl olduğu zât-ı mezbûretânı ârifân Müezzin es-Seyyid Feyzullah b. Musa ve Mehmed b. Mehmed şehâdetleriyle sâbit olan Mustafa b. Ahmed mahzarında İstanbul’da Sarı Bâyezid mahallesinde vâki‘ ma‘lûmü’l-hudûd ve’l-müştemilât bir bâb mülk menzilin yüz doksan iki sehim i‘tibârıyla elli iki sehmi ırsen ve şirâen müvekkile-i mezbûre Hadîce Hatun’un ve altmış dört sehmi vasîsi olduğu sadriye sagīre kızı Âişe’nin mülk ve hakları olup ve on iki sehmi benim kendi ırsen mülküm ve altmış dört sehmi vasîsi olduğum sadriye sagīre kızım Ümmügülsüm’ün kezâlik mülk-i mevr[û]su olmağla menzil-i mezkûr kābil-i taksîm olmamağla işbu bir kıt‘a i‘lâm-ı şer‘î nâtık olduğu üzere bin yüz altmış iki senesi Rebî‘ülevvel’inin on dördüncü gününden iki yüz on yedi gün tamamına değin müvekkile-i mezbûre Hadîce ile sagīre kızı mezbûre Âişe muhâyeeten sâkineler olup müddet-i mezkûr tamamında yüz kırk iki gün tamamına değin ben sagīre kızım Ümmügülsüm ile ber-vech-i muharrer muhâyeeten sâkineler olmak üzere herbirimiz asâleten ve vesâyeten râziyeler olmuşidik hâlâ müvekkile-i mezbûre Hadîce Hatun ile sagīre kızı mezbûre Âişe’nin ber-vech-i meşrûh müddetler tamam olmağın menzil-i mahdûd-ı mezkûru tahliye ve bana teslîm olunması bi’l-asâle ve bi’l-vesâye matlûbumdur deyü da‘vâ eyledikde vekîl-i mezbûr Mustafa dahi fi’l-hakīka hâl vech-i meşrûh üzere olduğunu ikrâr ve i‘tirâf etmeğin mûcebiyle menzil-i mahdûd-ı mezkûru müvekkile-i mezbûre Hadîce Hatun tahliye ve müdde‘iye-i mezbûre Zeyneb Hatun’a yüz kırk iki gün kızı ile ma‘an sâkine olmak için teslîme vekîl-i mezbûr Mustafa’ya tenbîh olunduğu Mahkeme-i Bâb’da ba‘de’t-tescîl huzûr-ı âlîlerine i‘lâm olundu. Fî 5 min-Zilhicce sene 1162