Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 391 Hüküm no: 500 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. İbrahim’in bogası bedelinden Gonca bt. Artin’deki alacağını kefili Karabet v. Pedros’un ödemesine yapılan tenbih Ma‘rûz Sahib-i arzuhâl es-Seyyid Mustafa Çelebi b. es-Seyyid İbrahim meclis-i şer‘-i hatîrde derûn-ı arzuhâlde mastûr Karabet v. Pedros nâm zimmî muvâcehesinde gāibetü ani’l-meclis Samatya’da sâkine Gonca bt. Artin v. Agop nâm Nasrâniye zimmetinde bogası semeninden yir[mi] dört buçuk guruş hakkıma mesfûr Kara[bet] târih-i i‘lâmdan bir buçuk sene mukaddem Süleymâniye Câmi‘-i şerîfi kurbünde kefîl ve dâmin olmuşidi hâlâ meblağ-ı mezkûru mesfûr Karabet zimmîden kefâlet-i mahkiyesine binâen taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan es-Seyyid Ömer Çelebi b. el-Hâc Mehmed ve Ali Çelebi b. Mustafa nâm kimesneler şehâdetleriyle mesfûr Karabet muvâcehesinde vech-i şer‘î üzere isbât etmeğin mûcebince meblağ-ı mezkûr yirmi dört buçuk guruşu bi-hükmi’l-kefâle müdde‘î-i mezbûr es-Seyyid Mustafa’ya edâ ve teslîme mesfûr Karabet zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu bâkī emr ü fermân hazret-i veliyyü’l-emrindir. Fî 27 Zilhicce sene 1162