Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 392 Hüküm no: 501 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Todori v. Yorgaki’nin Kapamacı Kabril’de alacağı olduğu iddiasıyla açtığı davayı ispat edemediği Ma‘rûz [64b] Muhzır Hacı Süleyman mübâşeretiyle Bâb Mahkemesi’ne ihzâr olunan kapamacı tâifesinden Kabril nâm zimmînin hasmı Derzi Todori v. Yorgaki meclis-i şer‘-i hatîrde mesfûr Kabril zimmî muvâcehesinde bundan akdem mesfûr Kabril zimmîye beher şehr sekizer guruş ücret kavliyle sekiz ay terzilik ücretinden müctemi‘ olan altmış dört guruş hakkımdan on altı guruşunu mesfûr yedinden ba‘de’l-kabz bâkī kırk sekiz guruş hakkım zimmetinde kalmışidi hâlâ meblağ-ı bâkī-i mezkûru dahi mesfûr Kabril’den taleb ederim deyü ba‘de’d-da‘vâ ve’s-suâl mesfûr Kabril cevâbında fi’l-vâki‘ müdde‘î-i merkūm kendiye ücret kavliyle terzilik işlediğini ikrâr lâkin târih-i i‘lâmdan iki buçuk sene mukaddem müdde‘î-i mesfûr ile ustalar beyninde Şehzâde Câmi‘-i şerîfi kurbünde kapamacı dükkânımda hesâb görüp ücretini yedimden tamamen ahz eyleyip husûs-ı mezkûra müte‘allika âmme-i da‘vâdan benim zimmetimi ibrâ ve ıskāt etmişidi deyü ba‘de’d-def‘ ve’l-inkâr mesfûr Kabril def‘-i mezkûrunu lede’t-tezkiye adâletleri zâhir olan altmış bir cemâ‘ati neferâtından İsmail Beşe b. Ali ve Molla Mehmed b. Abdullah nâm kimesneler ile Kapamacı Matyoz v. Ohan nâm zimmî şehâdetleriyle mesfûr Todori muvâcehesinde vech-i şer‘î üzere isbât etmeğin mûcebince müdde‘î-i merkūm Todori meblağ-ı mezkûr mutâlebesiyle mesfûr Kabril’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 27 Zilhicce sene 1162