Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 398 Hüküm no: 513 Orijinal metin no: [65b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Abdullah’ın nikahlısı olduğu halde babası Helvayî Mehmed Çelebi’nin izni olmadığından kendisine teslim Bâ-mühr-i hazret-i efendi Ma‘rûz Mehmed Beşe b. Abdullah nâm kimesne meclis-i şer‘de sahib-i arzuhâl Helvâyî Mehmed Çelebi muvâcehesinde mezbûr Helvâyî Mehmed’in sulbiye kızı Habibe nâm hatun zâtı ba‘de’t-ta‘rîf hâzıra olduğu hâlde târih-i i‘lâmdan on dokuz gün mukaddem Seydi Halîfe mahallesinde işbu mezbûre Habibe’yi huzûr-ı Müslimînde üç bin akçe mehr-i müeccel tesmiyesiyle bi’t-terâzî tezevvüc edip hâlâ zevce-i menkûham iken babası işbu mezbûr Mehmed Çelebi benim iznim yok idi deyü akd-i mezkûra ta‘arruza tesâddî ve mezbûreyi bana teslîmden imtinâ‘ ve mezbûre Habibe dahi akd-i mezkûra râziye olmamışidim deyüp bu vechile beynimizde münâza‘ât-ı kesîre vakı‘a olmuşidi el-hâletü hâzihî mezbûr Helvâyî Mehmed Çelebi akd-i mezkûra râzı olup ve mezbûre Habibe Hatun dahi mukaddemâ râziye olduğunu mu‘terife olup ve mezbûre Helvâyî Mehmed Çelebi zevcem mezbûre Habibe’yi bana teslîme müte‘ahhid olmağla ben dahi râzı olup kat‘-ı nizâ‘ eyledik dediğini mezbûr Helvâyî Mehmed Çelebi ve kızı mezbûre Habibe Hatun’u tasdîk etmeleriyle bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 2 Muharrem sene 1162 [1163]