Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 399 Hüküm no: 514 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un vakıf evlerinden birinde kalan kızı Hatice Hatun’un, ikamet ettiği süreye ait kira bedelinden kız kardeşleri Zeliha ve Âkıle’nin hisselerine düşen miktarı ödemesine yapılan tenbih Bâ-mühr-i hazret-i efendi Ma‘rûz Sahibetân-ı arzuhâl Zeliha ve Âkıle nâm hatunlar zâtları ba‘de’t-ta‘rîfi’ş-şer‘î meclis-i şer‘de kız karındaşları olup zâtı ta‘rîf-i şer‘î ile mu‘arrefe olan derûn-ı arzuhâlde mezkûreti’l-ism Hadîce Hatun ile terâfu‘larında İstanbul’da Şehzâdebaşı kurbünde Emin Nureddin mahallesinde vâki‘ vâlidemiz müteveffiye Fâtıma nâm hatunun hayatında vakfiye-i ma‘mûlün-bihâsı mantûkunca gallesini evlâd-ı evlâda şart ve ta‘yîn eylediği birbirine muttasıl üç bâb menzilin ber-mûceb-i şart-ı vâkıfe gallesine ale’l-iştirâki’s-seviy mutasarrıfeler iken mârrü’z-zikr menâzilden harem ta‘bîr olunur bir bâb menzilde kız karındaşımız mezbûre Hadîce Hatun târih-i i‘lâma gelince yirmi dört ay münferiden kendi sâkine olmağla şuhûr-ı mezkûrda iktizâ eden icâresinden hissemizi mezbûre Hadice’den taleb ederiz deyü ba‘de’d-da‘vâ mezbûre Hadîce Hatun dahi ber-vech-i muharrer menzil-i mezkûrda yirmi dört ay sâkine olduğunu ikrâr etmeğin menzil-i mezkûrun beher şehr icâre-i misli bin ikişer yüz akçe olduğunu ba‘de’l-istihbâr mezbûrâtdan herbiri terâzî ve tevâfuk dahi eylediklerinden sonra mezbûre Hadice’nin menzil-i mezkûrda sâkine olduğu yirmi dört ayda menzil-i mezkûr icâresinden mezbûretân Zeliha ve Âkıle’nin beher şehr hisselerine isâbet eden sekizer yüz akçeden cem‘an on dokuz bin iki yüz akçeyi müdde‘iyetân-ı mezbûretân Zeliha ve Âkıle hatunlara edâ ve teslîme mezbûre Hadîce Hatun’a tenbîh olunduğu huzûr-ı âlîlerine i‘lâm olundu. Fî 2 Muharrem sene 1162 [1163]