Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 400 Hüküm no: 515 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesi ahalisinin, uygunsuz tavır ve davranışları olan Ali Usta b. Mehmed ile hanımı Zeyneb bt. Mustafa’nın mahallelerinden ihraç edilmeleri talepleri Mahalleden ihrâc Ma‘rûz Ashâb-ı arzuhâl İstanbul’da Sancakdâr Hayreddin mahallesi imâmı Mehmed Efendi b. el-Hâc Mehmed ve müezzini Molla Mustafa b. Abdurrahman ve ahâlîsinden İshak Efendi b. Süleyman ve Ahmed Efendi b. el-Hâc Abdullah ve es-Seyyid Ömer b. Süleyman ve el-Hâc Ali b. Mehmed ve Salih Efendi b. Abdullah ve es-Seyyid Mehmed b. İbrahim ve Cafer b. İbrahim ve Ali b. Mehmed ve Mustafa b. ( ) [ve] Veli b. Mustafa ve Mehmed b. Abdülgani ve Nu‘man b. Mehmed ve Mehmed b. Hasan ve sâirleri meclis-i şer‘de mahalle-i mezbûre sükkânından Ali Usta b. Mehmed muvâcehesinde mezbûr Ali Usta kendi ve zevcesi gāibetü ani’l-meclis Zeyneb bt. Mustafa kendi hâllerinde olmayıp bed-zebân ve hadîdü’l-lisân olup dâimâ herbirimize itâle-i lisândan hâlî olmadıklarından mâ‘adâ ibâdullâhın ehl ü ıyâllerini idlâl ve ifsâd edip ve ecânibden ricâl ve nisâdan mechûlü’l-ahvâl kimesneleri menziline getirmekle mezbûrdan bir vechile emniyetimiz olmamağla mahallemizde sâkin oldukca kat‘a râhatımız yokdur deyü bi’l-muvâcehe teşekkî ve mezbûr Ali Usta’nın ve zevcesinin mahallelerinden hurûcu için fermân-ı âlî ricâsında oldukları Bâb’dan huzûr-ı âlîlerine i‘lâm olundu fermân men-lehu’l-emrindir. Fî 4 Muharrem sene 1162 [1163]