Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 401 Hüküm no: 517 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Bâyezid mahallesi ahalisinin talepleriyle kendisinden rahatsız oldukları Zeyneb bt. Abdullah’ın, kızı Ümmügülsüm’le kaldıkları evden çıkıp başka yerde ikamet etmeyi kabul ettiği Ma‘rûz İstanbul’da Sarı Bâyezid mahallesi ahâlîsinden ashâb-ı arzuhâl mahalle-i mezbûre imâmı Hüseyin Efendi b. Mehmed ve Müezzin es-Seyyid Feyzullah b. Musa ve ahâlîsinden Ahmed Efendi b. Mehmed İsmail Efendi b. Osman Mehmed b. Mustafa el-Hâc Ömer b. Mehmed Ali b. Mustafa es-Seyyid Mehmed b. es-Seyyid Mehmed es-Seyyid Ahmed b. Mehmed Mustafa Efendi b. İsmail Molla Ahmed b. İsmail nâm kimesneler meclis-i şer‘de derûn-ı arzuhâlde mezkûreti’l-ism Zeyneb bt. Abdullah nâm hatun muvâcehesinde mezbûre Zeyneb Hatun ile vasîsi olduğu sadriye sagīre kızı Ümmügülsüm’ün mahalle-i mezbûrede vâki‘ ma‘lûmü’l-hudûd bir bâb mülk menzilde yedlerinde olan i‘lâm-ı şer‘iye mantûkunca bi-tarîkı’l-muhâyee hâlâ yüz kırk iki gün mezbûre Zeyneb ile kızı sagīre-i mezbûre Ümmügülsüm’ün nevbet-i tasarrufları olmağla mezbûre Zeyneb Hatun menzil-i mezkûrda sâkine olmak murâd ederken mezbûre Zeyneb kendi hâlinde olmayıp ahâlî-i mahallenin ricâl ve nisâsı mezbûrenin lisânından müteezzîler olup her vechile kendiden râhat ve emniyetimiz olmamağla mezbûre Zeyneb’in ve kızı sagīre-i merkūmenin nevbet-i muhâyeeleri olan yüz kırk iki gün tamamına değin menzil-i mezkûr âhara îcâr olunup icâresi kendiye verilmek murâdımızdır deyü herbiri ba‘de’t-teşekkî mezbûre Zeyneb Hatun dahi ba‘de’l-yevm menzil-i mezkûrda nevbet-i muhâyeesi tamam olunca kendi sâkine olmayı[p] mahalle-i mezbûre imâmı ma‘rifetiyle küfelâsıyla bir âhar kimesneye îcâr olunmak üzere râziye olup bu vechile kat‘-ı nizâ‘ eyledikleri Bâb’dan huzûr-ı âlîlerine i‘lâm olundu. Fî 4 Muharrem sene 1163