Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 417 Hüküm no: 542 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katrina bt. Yanaki ile kızı Anaştasya’nın alacak iddiasıyla Yanaki v. Kostantin’e açtıkları davayı ispat edemedikleri Ma‘rûz Şahsı ta‘rîf-i şer‘î ile mu‘arrefe olan sahibe-i arzuhâl Katrina bt. Yanaki nâm Nasrâniye Bâb Mahkemesi’nde sâbıkā güveyisi olup Kapıkethudâsı Hâfız Osman Beşe mübâşeretiyle meclis-i şer‘-i envere ihzâr ettirdiği Yanaki v. Kostantin nâm zimmî ile terâfu‘larında mesfûr[e] Katrina bin yüz altmış iki senesinin şuhûr-ı Rûmiye’sinde mâh-ı Ağustos’unun gurresi günü Kumkapı kurbünde Çardaklı Kilisesi derûnunda mezbûr Yanaki zimmîye kızım hâzıratü bi’l-meclis Anaştasya Nasrâniye’yi almaği’çün bi-tarîkı’r-rüşve kırk zer-i mahbûbî altın vermişidim deyü da‘vâ ve kızı hâzıra-i mersûme Anaştasya dahi mezbûr Yanaki’den târih-i mezkûrda akrabâmdan ve ehibbâmdan bana saçı olmak üzere gelen kırk guruş zimmetinde kalmağla meblağ-ı mezbûru taleb ederim deyü da‘vâ eylediklerinde mezbûr Yanaki ber-vech-i muharrer müdde‘âlarını bi’l-külliye inkâr etmeğin müdde‘iyetân-ı mesfûretân ber-minvâl-i meşrûh müdde‘âlarını beyâna kādireler olmayıp talebleriyle mezbûr Yanaki’ye vech-i şer‘î üzere yemîn verilmeğin mûcebiyle müdde‘iyetân-ı mezbûretân Katrina ve Anaştasya Nasrâniyeler bilâ-beyyine-i âdile mezbûr Yanaki’ye bî-vech mu‘ârazadan men‘ olundukları tescîl ve bi’l-iltimâs huzûr-ı âlîlerine i‘lâm olundu. Fî 15 Muharrem sene 1163