Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 417 Hüküm no: 543 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan’ın boşandığı kocası Bostanî Mehmed’deki alacağının ödemesine yapılan tenbih Ma‘rûz Mumcu Ali Beşe mübâşeretiyle Bâb Mahkemesi’ne ihzâr olunan Bostânî es-Seyyid Mehmed’in zevce-i mutallakası olup zâtı ta‘rîf-i şer‘î ile mu‘arrefe olan Fâtıma bt. Hasan nâm hatun meclis-i şer‘de mezbûr es-Seyyid Mehmed ile terâfu‘larında mezbûr es-Seyyid Mehmed zimmetinde cihet-i karzdan on dört guruş ve emriyle sakaya ve habbâza verdiğim altı guruş ki min-haysü’l-mecmû‘ yirmi guruş ile yedimden ve malımdan aldığı kırk guruş kıymetli iki kat mükemmel camaşur hâlâ zimmetinde kalıp hatta bundan akdem mezbûr es-Seyyid Mehmed ile muhâla‘a olduğumuzda meblağ-ı mezkûr yirmi guruş ile iki kat mükemmel camaşur bana zimmetinde deyni olduğunu huzûr-ı Müslimînde ikrâr dahi etmişidi meblağ-ı mezkûr ile camaşurumun aynıları mevcûd ise aynılarını müstehleke ise kıymet-i şer‘iyelerini mezbûr es-Seyyid Mehmed’den taleb ederim deyü da‘vâ mezbûr es-Seyyid Mehmed camaşurları ikrâr lâkin meblağ-ı mezkûru inkâr etmeğin müdde‘iye-i mezbûre ber-vech-i muharrer müdde‘âsını lede’t-tezkiye adâletleri zâhir olan sâkin oldukları Müneccim Sadi mahallesi imâmı Hüseyin Efendi b. Abdurrahman ve Müezzin Molla Mustafa b. Ali ve Mehmed Beşe b. İbrahim şehâdetleriyle mezbûr es-Seyyid Mehmed muvâcehesinde vech-i şer‘î üzere ba‘de’l-isbât mezbûre Fâtıma iki kat mükemmel camaşurunu bâ-vesâtet-i muslihîn mezbûr es-Seyyid Mehmed ile beş guruş üzerine sulh olmağın meblağ-ı müdde‘â-bih yirmi guruş ile bedel-i sulh-ı mezkûr beş guruş ki min-haysü’l-mecmû‘ yirmi beş guruşu müdde‘iye-i mezbûre Fâtıma Hatun’a edâya mezbûr es-Seyyid Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 13 Muharrem sene 1163