Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 422 Hüküm no: 551 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbti Hanife bt. Nasuh’un borç aldığı Marta b. Toros’a rehin verdiği kuşağının iadesi talebiyle açtığı davada mahsuplaşıp sulh oldukları Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Hanife bt. Nasuh nâm Kıbtîye Bâb Mahkemesi’ne Muhzır el-Hâc Süleyman mübâşeretiyle meclis-i şer‘-i envere ihzâr ettirdiği Marta bt. Toros nâm Nasrâniye muvâcehesinde târih-i i‘lâmdan on dokuz ay mukaddem mesfûre Marta Nasrâniye yedinden istikrâz ve ahz u kabz ve istihlâk eylediği beş guruş deynim mukābelesinde yedi buçuk guruş kıymetli otuz dirhem çift [el]işi bir sîm kuşağımı kendiye rehin vaz‘ ve teslîm etmişidim hâlâ deyn-i meblağ-ı mezbûr beş guruşu yedimden ahzıyla zikrolunan kuşağım mesfûre Marta Nasrâniye’den taleb eylediğimde ol dahi mezkûru âhara bey‘le istihlâk eyledim deyü ba‘de’l-münâza‘a bâ-vesâtet-i muslihîn mârrü’z-zikr kuşağın kıymeti olan yedi buçuk guruşun beş guruşunu deynim olan beş guruşa ba‘de’l-mukāssa ve’l-kabûl mâ‘adâ iki buçuk guruş da‘vâsından mesfûre Marta Nasrâniye ile doksan para bedel-i makbûza sulh olup husûs-ı mezkûrelerimize ve târih-i i‘lâma gelince sâire müte‘allika âmme-i da‘vâdan herbirimiz âharın zimmetini ibrâ ve ıskāt eyledikde herbirimiz âharın ibrâsını kabûl eyledik deyü olan ikrârını mesfûre Marta Nasrâniye tasdîk eyle[diği] huzûr-ı âlîlerine i‘lâm olundu. Fî 16 Muharrem sene 1163