Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 422 Hüküm no: 550 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kite kazasının Kaya köyünden Halil b. Ali’nin çeşitli eşya bedellerinden alacağı olduğu Mustafa Beşe b. Ali’nin borcunu ödemesine yapılan tenbih Ma‘rûz Fi’l-asl vilâyet-i Anadolu’da Kite kazâsına tâbi‘ Kaya nâm karye ahâlîsinden olup İstanbul’da Yeni Câmi‘ kurbünde Osman Haseki dükkânında müsâfiren sâkin sahib-i arzuhâl Halil b. Ali nâm kimesne Mahkeme-i Bâb’da meclis-i şer‘de Mustafa Beşe b. Ali ile terâfu‘larında işbu yedimde olan bin yüz altmış senesi Ramazan-ı şerîf’i gurresi târihiyle müverrah bir kıt‘a deyn temessüğü mûcebince mezbûr Mustafa Beşe zimmetinde cihet-i karz-ı şer‘îden üç yüz seksen guruş ve yedimden müşter[â] ve makbûz bir desti revgan-ı sâde ve altı aded Bursa kutnîsi ve sekiz çift peştemal ve bir vakıyye ipek ve bir çuka biniş ve bir güvezî Sakız şâlı ve bir boylu tüfenk semenlerinden dahi yüz altmış guruş ki cem‘an beş yüz kırk guruş hakkım olmağla taleb ederim deyü ba‘de’d-da‘vâ ve’s-suâl ve’l-inkâr müdde‘î-i mezbûr Halil müdde‘âsını lede’t-tezkiye adâletleri zâhir olan Dergâh-ı âlî yeniçerilerinden doksan altı cemâ‘ate mahsûs oda neferâtından Salih Beşe b. Hasan ve Hüseyin Beşe b. Mehmed şehâdetleriyle mezbûr Mustafa Beşe muvâcehesinde vech-i şer‘î üzere isbât etmeğin mûcebince meblağ-ı mezkûr beş yüz kırk guruşun müdde‘î-i mezbûr Halil’e tamamen edâsıyla merkūm Mustafa Beşe ilzâm olunduğu mahkeme-i mezbûreden huzûr-ı âlîlerine i‘lâm olundu. Fî 18 Muharrem sene 1163