Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 433 Hüküm no: 569 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahnikapan sokağında yanan evini yeniden inşa etmeye başlayan Hacı Ali’nin, Kutucu Osman’ın evine nâzır pencere açmamak üzere evini inşa etmesine izin verildiği Bâ-mühr-i hazret-i efendi Ma‘rûz Arzuhâlde mezkûr husûsu mahâllinde keşf ve tahrîri için fermân-ı âlîlerine imtisâlen cânib-i şer‘den irsâl olunan keşif nâibimiz İbrahim Efendi dâ‘îleri mi‘mâr ağa kulları bi-nefsihi ve hulefâsından es-Seyyid Mehmed ve Yakub ile Sultan Bâyezid Câmi‘-i şerîfi kurbünde Yahnikapan sokağında vâki‘ sahib-i arzuhâl el-Hâc Ali’nin bi’l-icâreteyn tasarrufunda olan ma‘lûmü’l-hudûd binâsına şürû‘ olunup henüz tekmîl-i binâ olunmayan menzile varıp keşif ve müşâhede ettiklerinde mezbûr el-Hâc Ali zikrolunan menzili muhterik oldukdan sonra binâsına mübâşeret ve ancak kereste ile müştemilât-ı ma‘lûmesini ta‘yîn edip binâ-i merkūmun kadîmîsi işbu mu‘âyene olunan vech üzere kimesneye dahi zararı yokdur deyü cerîdede mazbûtü’l-esâmî on iki nefer bî-garaz Müslimîn ile mi‘mârûn-ı mezbûrûn haber verdiklerini ve binâ-i mezkûra mâni‘ olan işbu hazır bi’l-meclis Kutucu Osman menzili tarafına pencere ihdâs etmeyip ve iktizâ eden mahallerin havâle-i şer‘iyesini def‘ etmeğe mezbûr el-Hâc Ali müte‘ahhid olup bu minvâl üzere menzil-i mezkûrun binâ ve itmâmına bi-gayr-ı vech-i şer‘î kimesne mümâna‘at etmemek bâbında fermân-ı âlî ricâ eylediğini mezbûr dâ‘îleri mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ ve takrîr eylediği ber-mûceb-i fermân-ı âlî huzûr-ı âlîlerine i‘lâm olundu. Fî 27 Muharrem sene 1163