Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 432 Hüküm no: 568 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Parsadan’ın, Maryora bt. Yorgi’de alacağı olduğu iddiasıyla varisleri olan oğulları Yanaki, Yorgi, Mihal ve Dimitraki’ye açtığı davayı ispat edemediği Ma‘rûz Mahrûse-i Üsküdar’a tâbi‘ Çengel karyesinde sâkine iken bundan akdem hâlike olan Maryora bt. Yorgi v. Kosta nâm Nasrâniyenin verâseti sadrî kebîr oğulları Yanaki ve Yorgi ve Mihal ve Dimitraki ve kebîr kızı Arhondi evlâd-ı Üstoyko’ya münhasıra olduğu müte‘ayyin oldukdan sonra sahib-i arzuhâl Avanis v. Parsadan zimmî bi’t-terâzî Bâb Mahkemesi’nde meclis-i şer‘de verese-i merkūmûndan Yanaki ve Yorgi ve Mihal muvâcehelerinde işbu yedimde olup mahkeme-i şer‘iyâtdan i‘tâ olunan bir kıt‘a i‘lâm-ı şer‘îde tafsîl olunduğu vech üzere bundan akdem mesfûr Yanaki zimmî ile ba‘de’l-mürâfa‘ati’ş-şer‘iye zimmetinde asâleten ve kefâleten bin yüz on altı guruş mahkûmun-bih hakkıma bin yüz altmış bir senesi Muharremi’l-harâm’ının yirmi birinci günü İstanbul’da Destereciler kurbünde vekîlim Tüfenkçi Hüseyin Ağa’nın sâkin olduğu menzilde anaları hâlike-i mesfûre Maryora bt. Yorgi v. Kosta nâm Nasrâniye hayatında meblağ-ı mezbûr bin yüz on altı guruşa bi’l-emr ve’l-kabûl kefâlet-i sahîha ile kefîl ve dâmin oldukdan sonra meblağ-ı mezbûru bana kable’l-edâ mesfûr[e] Maryora hâlike olmağla tereke-i vâfiyesinden bi-hükmi’l-kefâle taleb ederim deyü ba‘de’d-da‘vâ ve’s-suâl [73b] merkūmûn Yanaki ve Yorgi ve Mihal zimmîlerden herbiri cevâblarında mevrûseleri anaları hâlike-i mesfûre Maryora hayatında mesfûr Yanaki’nin ancak nefsine kefîl olduğunu ikrâr lâkin ber-vech-i muharrer meblağ-ı mezbûrun edâsına kefîl ve dâmin olduğunu ve hâlike-i mesfûre Ma[r]yora’nın tereke-i vâfiyesi olduğunu vaz‘-ı yedlerini bi’l-külliye inkâr etmeleriyle müdde‘î-i merkūm Avanis zimmî kefâlet-i mezkûreyi isbât için kirâren ve mirâren ba‘de’l-istimhâl ve’l-imhâl merkūm Avanis zimmînin şâhid olmak üzere ikāmet eylediği kimesneler edâ-i şehâdet-i şer‘iye edememeleriyle cerh olunup müdde‘âsına mutâbık udûlden şâhid-i âhar ikāmeti için yine ba‘de’l-imhâl müddet-i mehl tamam oldukda ityân-ı beyyineye kādir olmayıp tahlîfe dahi tâlib olmamağla müdde‘î-i merkūm Avanis zimmî bilâ-beyyine-i âdile mu‘ârazadan men‘ olunduğu huzûr-ı âlîlerine i‘lâm olundu. Fî 29 Muharrem sene 1163