Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 434 Hüküm no: 571 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri kâtiplerinden Hüseyin Efendi b. Hasan’ın, Osman Ağa b. Hasan ve Salih Ağa b. Mustafa’ya olan borçlarını ödemesi Bâ-mühr-i hazret-i efendi Ma‘rûz Ashâb-ı arzuhâl Osman Ağa b. Hasan ve Salih Ağa b. Mustafa meclis-i şer‘de yeniçeri kalemi küttâbından Hüseyin Efendi b. Hasan ile terâfu‘larında mezbûrun zimmetinde cihet-i karz-ı şer‘îden mezbûr Osman Ağa b. Mehmed’in beş yüz doksan üç guruş ve mezbûr diğer Osman Ağa’nın yüz on üç guruş ve merkūm Salih Ağa’nın yüz on guruş cem‘an sekiz yüz on altı guruş hakkımız olup hatta bin yüz altmış iki senesi Şa‘bân-ı şerîf’in yirmi sekizinci günü meblağ-ı mezkûr herbirimize ber-minvâl-i muharrer zimmetinde cihet-i mezkûreden deyni olduğunu ikrâr ve imzâ ve hâtemini hâvî yedimize işbu temessüğü dahi vermişidi deyü takrîrlerine mutâbık bir kıt‘a temessük ibrâzıyla herbiri ba‘de’d-da‘vâ ve’s-suâl mezbûr Hüseyin Efendi minvâl-i meşrûh üzere herbirine deyni olduğunu ve târih-i mezkûrda ikrâr edip temessük verdiğini ikrâr ve i‘tirâf etmeğin mûcebince müdde‘î-i mezbûr Osman Ağa b. Mehmed’e beş yüz doksan üç guruş ve merkūm diğer Osman Ağa’ya tamamen edâ ve teslîm ile mezbûr Hüseyin Efendi ilzâm olunduğu ba‘de’t-tescîl huzûr-ı âlîlerine i‘lâm olundu. Fî 2 Safer sene 1163