Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 435 Hüküm no: 572 Orijinal metin no: [73b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yorgi’nin varislerinden oğlu Manol’un, kardeşi Gavril Rahip’ten terekedeki hissesini tamamen alıp hiçbir alacak ve hakkı kalmadığını beyan ettiği Bâ-mühr-i hazret-i efendi Ma‘rûz Vilâyet-i Anadolu’da medîne-i İzmir kazâsına tâbi‘ Urla kasabası re‘âyâsından olup mahrûse-i Galata’da bundan esbak hâlik olan Dimitri v. Yorgi v. Dimitri’nin verâseti zevce-i metrûkesi Yamando bt. Krorni Nasrâniye ile sulbî kebîr oğulları Praşkova ve Gavril ve Manol’a münhasıra oldukdan sonra mesfûr Praşkova dahi hâlik olup verâseti zevce-i metrûkesi Leri bt. Lamborno ile anası mezbûre Yamando ve sulbiye sagīre kızları Yamando ve Soful’a ve li-ebeveyn karındaşları mersûmân Gavril ve Manol’a inhisârı tahakkukundan sonra sahib-i arzuhâl merkūm Manol meclis-i şer‘de li-ebeveyn karındaşı mesfûr Gavril Râhib’in vekîl-i şer‘îsi Simyon v. Yorgaki muvâcehesinde hâlik-i evvel mesfûr Dimitri’nin bi’l-cümle terekesi beynimizde ma‘rifet-i şer‘le taksîm olunup karındaşım müvekkile-i merkūm Gavril Râhib benim hisse-i irsiyeme vâzı‘u’l-yed olmağla hisse-i irsiye-i ma‘lûmemi tamamen bana def‘ ve teslîm ve ben dahi yedinden tamamen ahz ve istifâ edip hâlikân-ı [74a] mesfûrânın terekelerine ve husûs-ı mirasa ve sâir beynimizde cereyân eden hukūk-ı ma‘lûme ve mechûleye müte‘allik âmme-i da‘vâdan karındaşım müvekkil-i mezbûrun zimmetini bin yüz altmış senesi Receb-i şerîf’inin on sekizinci günü Rumeli kazaskeri şer‘iyâtcısı müderrisîn-i kirâmdan Abdullah Efendi huzûrunda ibrâ-i âm ile ibrâ etmişidim el-hâletü hâzihî ben ibrâ-i mezkûru müvekkil-i merkūm bana yedi bin beş yüz guruş vermek şartıyla etmişidim deyü tesâddî eylediğim da‘vâyı zarûretimden hilâf-ı irtikâb eyledim da‘vâ-yı mezkûremde kâzibim takrîr-i mezkûrum olan ibrâ sahîhdir ve târih-i mezkûrdan işbu târih-i i‘lâma gelince kezâlik müvekkil-i mesfûr Gavril Râhib’in cemî‘ ahz u i‘tâ ve hukūk-ı ma‘lûme ve mechûleye müte‘allik âmme-i da‘vâdan zimmetini ibrâ-i âm ile ibrâ ve ıskāt eyledim ba‘de’l-yevm müvekkil-i mesfûr Gavril Râhib ile kat‘a da‘vâ ve nizâ‘ ve husûmetim ve cihetinde ve zimmetinde bir akçe ve bir habbe hakkım yokdur fîmâ-ba‘d asâleten ve vekâleten benden da‘vâ sudûr eder ise lede’l-hükkâmi’l-kirâm mesmû‘a olmasın dediğini vekîl-i merkūm Simyon zimmî tasdîk eylediği ba‘de’t-tescîl huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî-gurreti Safer sene 1163