Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 77 Hüküm no: 45 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elmalı kazasındaki Ömer Paşa Camii teravih imamlığına Seyyid Hâfız Naim Halîfe’nin tevcihi Ma‘rûz, Elmalı kazâsında vâki‘ Ömer Paşa Câmi‘-i şerîfinde ber-vech-i hasbî beher sene Ramazan-ı şerîfde hatm-i şerîf ile salât-ı terâvîh imâmı olan Hâfız Abdullah’ın yedinde berat olmamağla vakf-ı mezkûr mütevellîsi Kara Muradzâde Halil arzıyla bin yüz seksen altı senesi Saferü’nde müceddeden kayd ile merkūma tevcîh olunup iki yüz yirmi üç senesi tecdîd-i berat olundu. El-yevm üzerinde olduğu askerî rûznâmçesinden derkenâr olunmağla meâl-i arzuhâl ve derkenâra nazar ve bi’t-tahkīk keyfiyet ve iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Mehmed b. Salih ve Ömer b. Osman nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzuhâlde tahrîr ve inhâ kılındığı üzere mezbûr Hâfız Abdullah’ın bilâ-veled fevti vâki‘ ve sahib-i arzuhâl merkūm es-Seyyid Hâfız Ahmed Naim Halîfe muhtâr-ı cemâ‘at olduğu herbiri alâ-tarîkı’ş-şehâde ihbâr eylediklerinden sonra mezbûrun ehliyet ve istihkākı lede’l-imtihân zâhir ve nümâyân olmadığı bu sûretde hitâbet-i mezkûre müteveffâ-yı mezbûrun bilâ-veled mahlûlünden bi’n-nefs edâ-i hizmet etmek ve hizmet-i lâzımesinde tekâsülü vukū‘ bulur ise ref‘inden âhara verilmek şartıyla mezbûr es-Seyyid Hâfız Naim Halîfe’ye tevcîh olunmak bâbında emr [ü] fermân hazret-i veliyyü’l-emrindir. Fî 17 Ca sene [1]248