Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 76 Hüküm no: 44 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murtazaâbad kazasının Virancık Köyü Camii hitabet cihetinin Hasan Halîfe’ye tevcihi Ma‘rûz, Murtazaâbad kazâsına tâbi‘ Virancık nâm karyede vâki‘ câmi‘-i şerîfin yevmî bir akçe vazîfe ile hitâbet ciheti Ahmed Halîfe b. Abdullah’ın üzerinde olduğu askerî rûznâmçesinden derkenâr olunmağla meâl-i arzuhâl derkenâra nazaran iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Mehmed b. Himmet ve Musa b. Mustafa nâm kimesneler meclis-i şer‘a celb ile mezbûr Ahmed Halîfe ve sahib-i arzuhâl Hasan Halîfe hazır oldukları hâlde keyfiyeti gereği gibi etrâfıyla suâl olundukda cihet-i mezkûrenin mutasarrıfı Ahmed Halîfe işbu Ahmed Halîfe olduğunu ve mezbûr Hasan Halîfe dahi muhtâr-ı cemâ‘at idiğini herbiri alâ-tarîkı’ş-şehâde ba‘de’l-ihbâr mezbûr Ahmed Halîfe benim Der-aliyye’de maslahatım olduğundan hitâbet-i mezkûrenin hizmetini edâ edemeyeceğim âşikâr ve bî-hâsıl olduğundan vekâletle edâ-i hizmete dahi tahammülü olmadığı bedîdâr olduğuna binâen hüsn-i rızâ ve tayyib-i hâtırımla hitâbet-i mezkûreyi mezbûr Hasan Halîfe’ye bilâ-bedel kasr-ı yed ve yedimde olan atîk beratımı dahi teslîm eyledim deyü takrîrini mezbûr Hasan Halîfe tasdîk etmeğin bu sûretde bi’n-nefs varıp hizmet etmek ve hizmetine tekâsülü olur ise ref‘inden âhara verilmek şartıyla hitâbet-i mezkûre mezbûrun kasr-ı yedinden lede’l-imtihân ehliyet ve istihkākı nümâyân olan mezbûr Hasan Halîfe’[ye] tevcîh olunmak bâbında emr [ü] fermân hazret-i veliyyü’l-emrindir. Fî 17 Ca sene [1]248