Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 78 Hüküm no: 47 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Seyyid İbrahim Şemseddin Efendi’nin Kigork v. Agob’a olan borcunun terekesinden ödenmesi Vilâyet-i Anadolu’da Akhisar Geyve kādısı iken bundan akdem düyûnu terekesinden ezyed olduğu hâlde kazâ-i mezbûrede vefât eden Mir es-Seyyid İbrahim Şemseddin Efendi b. el-Hâc Halim Efendi b. Abdullah’ın terekesi mevâdd-ı mahsûsa kısmet-i askeriyeden olduğuna binâen müteveffâ-yı mezbûrun dâyinlerinden mahmiye-i İslâmbol’da Yenihan’da mütemekkin sarrâf tâifesinden hâmilü’r-rakīm Hudâverdi oğlu yeğeni Kigork v. Agob nâm zimmî meclis-i şer‘-i hatîr-ı lâzımü’t-tevkīrde müteveffâ-yı mezbûrun tereke-i kāsırasını kabz ve düyûn-ı müsbetesini edâya kıbel-i şer‘den dahi nasb olunan Mehmed Ağa b. Ali mahzarında üzerine da‘vâ ve takrîr-i kelâm edip işbu yedimde olup bin iki yüz kırk yedi senesi Cumâdelâhiresi’nin yirmi yedinci günü târihiyle müverrah ve müteveffâ-yı mezbûrun imzâ ve hâtemini hâviye mu‘anven ve mersûm bir kıt‘a temessük mantûkunca müteveffâ-yı mezbûr zimmetinde cihet-i karz-ı şer‘îden yirmi üç bin dört yüz guruş alacak hakkım olup hatta mezbûr es-Seyyid İbrahim Şemseddin Efendi hayatında şehr-i mezbûrun yirmi dokuzuncu günü hân-ı mezkûrda vâki‘ odamda huzûr-ı Müslimîn’de meblağ-ı merkūm cihet-i mezkûreden zimmetinde bana deyni olduğunu ikrâr ve i‘tirâf ve temessük-i mezkûru yedimde i‘tâ edip ba‘dehû meblağ-ı mezkûrun sekiz bin altı yüz elli dokuz guruşunu ceste ceste bana edâ ve teslîm [12a] ben dahi ahz ü kabz ve herbirinin irsâlâtında mikdârını mübeyyin ilmühaber şukkaları gönderip bâkīsi olan on dört bin yedi yüz kırk bir guruşu kable’l-edâ fevt olmağla meblağ-ı bâkī-i mezkûru terekesinden taleb ederim deyü ba‘de’d-da‘vâ ve’l-inkâr müdde‘î-i mersûmdan ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimîn’den ve müderrisîn-i kirâmdan Hüseyin Beyefendi b. Ahmed ve eşrâf-ı kuzât-ı kirâmdan el-Hâc Hüseyin Efendi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd ve fi’l-hakīka müteveffâ-yı mezbûr es-Seyyid İbrahim Şemseddin Efendi sâlifü’z-zikr kırk yedi senesi Cumâdelâhiresi’nin yirmi dokuzuncu günü İstanbul’da Yenihan’da vâki‘ müdde‘î-i mersûmun odasında bizim huzûrumuzda meblağ-ı mezkûru yirmi üç bin dört yüz guruş cihet-i karz-ı şer‘îden mersûm Kigork zimmîye bâ-temessük sahîhan deynimdir deyü hâl-i hayat ve kemâl-i akl ve sıhhatde ikrâr ve i‘tirâf ve temessük-i mezkûru i‘tâ ve bizi işhâd eyledi biz bu husûsa bu vech üzere şâhidleriz ve şehâdet dahi ederiz deyü herbiri müttefiku’l-lafz ve’l-ma‘nâ edâ-i şehâdet-i şer‘iye eylediklerinde lede’t-ta‘dîl ve’t-tezkiye şehâdetleri makbûle oldukdan sonra mersûm Kigork zimmîye vech-i vecîbe-i şer‘î üzere yemîn dahi verilmeğin mûcebiyle meblağ-ı bâkī-i merkūm on dört bin yedi yüz kırk bir guruşu müteveffâ-yı mezbûrun terekesinden mersûm Kigork zimmîye edâ ve teslîme dahi mezbûr Mehmed Ağa’ya tenbîh olunmağın mâ-hüve’l-vâki‘ bi’l-ibtigā sebt ve imlâ olundu. Fi’l-yevmi’s-sâbi‘ ve’l-işrîn min-Cumâdelûlâ li-sene semân ve erba‘în ve mieteyn ve elf. Şuhûdü’l-hâl: Eşrâf-ı kuzât-ı kirâmdan Mektûbî-i Sadr-ı Anadolu es-Seyyid Salih Afif Efendi, Mektûbî Yamağı Mustafa Efendi, Tatbîki Şeref Molla Efendi, Mehmed Ağa tâbi‘-i Hüseyin Efendi ve gayruhum.