Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 80 Hüküm no: 48 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedagara kazasındaki Karlık Camii’nin nısf müezzinlik cihetinin Mehmed Halîfe’ye tevcihi Ma‘rûz, Gedagara kazâsında vâki‘ Karlık Câmi‘-i şerîfinin yevmî bir akçe vazîfe ile müezzinlik cihetinin nısf hissesi mezbûr diğer Ahmed b. Mehmed’in üzerinde olduğu askerî rûznâmçesinden derkenâr olunmağla iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden bu esnâda Der-aliyye’ye gelen Mehmed b. Hasan ve Ömer b. Ahmed nâm kimesneler meclis-i şer‘a celb ile keyfiyeti gereği gibi etrâfıyla suâl olundukda mezbûr Ahmed Halîfe müsinn ü ihtiyâr ve müştereki mezbûr diğer Ahmed b. Ali nâm kimesne dahi adîmü’l-iktidâr olup mezbûr Ahmed Halîfe’nin oğlu sahib-i arzuhâl merkūm Mehmed sahib-i iktidâr olduğundan bu âna kadar müezzinlik-i mezkûrun hizmet-i lâzımesini bi’l-vekâle mezbûr Mehmed Halîfe idâre ve rü’yetetmekte olduğuna binâen mezbûr Ahmed Halîfe nısf hisse-i mezkûreyi hüsn-i rızâ ve ihtiyârıyla oğlu merkūm Mehmed Halîfe’ye kasr-ı yed ve atîk beratını huzûr-ı şer‘de teslîm edip kasr-ı yedinden oğlu merkūma tevcîh olunmak ahâlî-i kazânın matlûb ve mültemesidir deyü herbiri alâ-tarîkı’ş-şehâde ihbâr etmeleriyle bu sûretde müezzinlik-i mezkûrun hıdmet-i lâzımesini mu‘attal kalmamak için bi’n-nefs edâ-i hizmet etmek ve kasr-ı yedine amel ve ihbâr olunmayıp hizmet-i lâzımesiyle tekâsülü merkūma gelir ise ref‘inden âhara verilmek şartıyla nısf müezzinlik-i mezkûr babası merkūmun keff-i yedinden oğlu mezbûr Mehmed Halîfe’ye tevcîh olunmak bâbında emr [ü] fermân. Fî 11 Ca sene [1]248