Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 456 Hüküm no: 606 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Abraham ve Verador’un Istıranca köylülerinde olan alacaklarının kefili olan Hacı İsmail b. Hasan’ın ödemesine yapılan tenbih Bâ-mühr-i hazret-i efendi Ma‘rûz Sahibân-ı arzuhâl sarrâf tâifesinden Abraham v. Kigork ve şerîki Verador v. Karabet nâm zimmîler meclis-i şer‘de el-Hâc İsmail b. Hasan ile terâfu‘larında yedimizde olup bin yüz altmış bir senesi Zilka‘de’si gurresi târihiyle müverrah temessük mûcebince Hâslar kazâsına tâbi‘ Terkoz nâhiyesi karyelerinden Istıranca nâm karye ahâlîsinden İstemat v. Yorgi ve Yorgi Kaporakpo ve Semer Çorbacı ve Bodur Yani ve Apostol ve Çolak Yorgi ve sâir mazbûtü’l-esâmî yirmi beş nefer zimmîler zimmetlerinde malımızdan ve yedimizden istidâne ve kabz ve istihlâk eyledikleri iki bin yirmi dört guruşun edâsına işbu mezbûr el-Hâc İsmail tarafından emir ve kabûlü hâvî kefâlet-i sahîha-i şer‘iye ile kefîl ve dâmin olup ve meblağ-ı mezkûrdan yüz yirmi guruşunu medyûnlarımız olan mesfûrûndan biz ahz ü istifâ edip bâkī zimmetlerinde bin dokuz yüz iki guruş hakkımız kalmağla meblağ-ı bâkī-i mezkûru bi-hükmi’l-kefâle mezbûr el-Hâc İsmail’den taleb ederiz deyü takrîrlerine mutâbık bir kıt‘a temessük ibrâzıyla ba‘de’d-da‘vâ ve’s-suâl mezbûr el-Hâc İsmail dahi karye-i mezkûre ahâlîsinden cem‘an otuz bir nefer kimesnenin mesfûrâna cihet-i karz-ı şer‘îden iki bin yirmi dört guruş zimmetlerinde deynleri olduğunu ve kendinin meblağ-ı mezkûrun edâsına bi’l-emr ve’l-kabûl kefîl ve dâmin olduğunu ikrâr ve i‘tirâf etmeğin mûcebince meblağ-ı mezkûr bin dokuz yüz iki guruşu mesfûrân Abraham ve Verador zimmîlere tamamen edâ ile mezbûr el-Hâc İsmail ilzâm olunduğu ba‘de’t-tescîl huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 27 Saferü’l-hayr sene 1163