Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 455 Hüküm no: 605 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın, Havva bt. Ahmed’e emanet bıraktığı bilezik bedelini ödemesi için Havva’ya yapılan tenbih Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Sâliha bt. Abdullah nâm hatun derûn-ı arzuhâlde mezkûreti’l-ism olup zâtı kezâlik ta‘rîf-i şer‘î ile mu‘arrefe olan Havva bt. Ahmed nâm hatun ile meclis-i şer‘-i hatîrde terâfu‘larında mezbûre Havva Hatun’a târih-i i‘lâmdan iki sene mukaddem malımdan beher miskāli dörder guruşdan yetmiş iki guruş kıymetli bir çift altın bileziğimi bi-tarîkı’l-âriye verip hâlâ yedinde kalmağla mârrü’z-zikr bileziğin aynı yedinde mevcûde ise aynını müstehleke ise ba‘de’s-sübût kıymet-i mezkûresini bi-tarîkı’d-damân mezbûre Havva Hatun’dan taleb ederim deyü da‘vâ eyledikde mezbûre Havva Hatun cevâbında târih-i mezkûrda müdde‘iye-i merkūme Sâliha Hatun’un yedinden beher miskāli dörder guruşdan yetmiş iki guruş kıymetli on sekiz miskāl bir çift altın bileziği ahz u kabz edip aynı yedinde mevcûd olmayıp istihlâk ettiğini ikrâr lâkin mârrü’z-zikr altın bileziği müdde‘iye-i merkūme Sâliha Hatun bana hîbe-i sahîha ile hîbe ben dahi hîn-i hîbesinde ittihâb ve kabûl etmişidim deyü ba‘de’d-def‘ ve’l-inkâr mezbûre Havva Hatun def‘-i mezkûrunu bir vechile beyâna kādire olmayıp bi’t-taleb müdde‘iye-i merkūme Sâliha Hatun’a vech-i şer‘î üzere yemîn verilmeğin mûcebiyle mârrü’z-zikr altın bileziğin ikrârıyla kıymet-i müsbetesi olan yetmiş iki guruşu bi-tarîkı’d-damân müdde‘iye-i merkūme Sâliha Hatun’a edâ ve teslîme mezbûre Havva Hatun’a tenbîh olunduğu Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 27 S sene 1163