Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 458 Hüküm no: 608 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Menahim’in Takkeci Seyyid İbrahim b. Ali’den aldığı borca karşı rehin verdiği kürkü iadesi veya bedelini ödemesi için İbrahim’e yapılan tenbih Ma‘rûz Arzuhâl eden Yako v. Menahim nâm Yahûdî meclis-i şer‘-i enverde takyeci tâifesinden derûn-ı arzuhâlde mezkûrü’l-ism es-Seyyid İbrahim b. es-Seyyid Ali nâm kimesne mahzarında târih-i i‘lâmdan bir buçuk sene mukaddem mezbûr es-Seyyid İbrahim’in yedinden ve malından istikrâz ve ahz u kabz eylediğim sekiz [guruş] deynim mukābelesinde mezbûr es-Seyyid İbrahim’e rehin olmak üzere yirmi yedi guruş kıymetli bir dîbâ kaplı sincab kürkümü def‘ ve teslîm etmişidim hâlâ deyn-i mersûm sekiz guruşu mezbûr es-Seyyid İbrahim’e işbu hazır bi’l-meclis tâife-i mezkûreden es-Seyyid Ahmed b. es-Seyyid Mustafa yediyle edâ etmemle kendiye rehin deyü medfû‘um olan mârrü’z-zikr sincab kürkün aynı mevcûd ise aynını müstehlek ise ba‘de’s-sübût kıymet-i mezkûresini mezbûr es-Seyyid İbrahim’den taleb ederim deyü ba‘de’d-da‘vâ ve’s-suâl mezbûr es-Seyyid İbrahim cevâbında târih-i mezkûrda müdde‘î-i mesfûr Yako Yahûdî kendiden istikrâz ve kabz eylediği sekiz guruş deyni mukābelesinde kendiye rehin olmak üzere bir dîbâ kaplı sincab kürkünü def‘ ve teslîm eylediğini ikrâr lâkin müdde‘î-i mesfûr Yako Yahûdî deyn-i meblağ-ı mersûm sekiz guruşu bana irsâl eylediğinde rehn-i mezkûr sincab kürkü mezbûr es-Seyyid Ahmed yediyle kızı Sara nâm Yahûdiye’ye irsâl eyle deyü bana emretmekle ben dahi emrine binâen hâzır-ı merkūm es-Seyyid Ahmed’e kızı mesfûr Sara Yahûdiye’ye irsâl etmek için teslîm etmişidim deyü ba‘de’d-def‘ ve’l-inkâr mezbûr es-Seyyid İbrahim def‘-i meşrûhunu bir vechile beyâna kādir olmayıp talebiyle mesfûr Yako Yahûdî’ye vech-i şer‘î üzere yemîn verildikden sonra rehn-i mezkûr sincab kürkün kıymeti mezbûr es-Seyyid İbrahim’den istintâk olundukda ancak sekiz guruş olduğunu ikrâr ziyâde on dokuz guruş kıymetini inkâr edicek müdde‘î-i mesfûr Yako Yahûdî dahi kürkün ziyâde kıymetini bir vechile beyâna kādir olmayıp bi’t-taleb mezbûr es-Seyyid İbrahim’e bi’d-defa‘ât yemîn teklîf olundukda rehn-i mezkûrun kıymeti yirmi yedi guruş olduğu mezbûr es-Seyyid İbrahim’in yemînden nükûlüyle vech-i şer‘î üzere sâbit olmağın mûcebiyle rehn-i mezkûr sincab kürkün aynı mevcûd ise aynını müstehlek ise kıymet-i müsbetesi olan yirmi yedi guruşu müdde‘î-i mesfûr Yako Yahûdî’ye bi-tarîkı’d-damân edâ ve teslîme mezbûr es-Seyyid İbrahim’e tenbîh olunduğu Mahkeme-i Bâb’da ba‘de’t-tescîl huzûr-ı âlîlerine i‘lâm olundu el-emrü li-men-lehu’l-emr. Fî 28 min-S sene 1163