Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 459 Hüküm no: 609 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in, yağ alacağı kaldığı iddiasıyla mumcular İstirati ve Yuvan’a açtığı davada haksız bulunup davanın reddedildiği Ma‘rûz Bâ‘is-i i‘lâm Mehmed b. İbrahim meclis-i şer‘-i enverde mumcu tâifesinden İstirati v. Yorgi ve Yuvan v. İstemati zimmîler muvâcehelerinde bundan akdem mezbûrâna mum dökmek için beher vakıyyesi dörder akçe ücret kavliyle bin vakıyye don yağı teslîm eylediğimden sonra sekiz yüz doksan beş vakıyyesini bana mum döküp ba‘de’t-teslîm zimmetlerinde yüz beş vakıyye yağım kalmağla taleb ederim deyü da‘vâ eyledikde cevâblarında ber-vech-i muharrer müdde‘î-i mezbûrun mum dökmek için bin vakıyye yağını ahz u kabz eylediklerini ikrâr lâkin mezkûr yağın çamuru ziyâde çıkıp hatta kendiye gösterdik zimmetimizde bir şeyi bâkī kalmadı dediklerinde husûs-ı mezkûrda mezbûrân ümenâdan olup yemînleri ile tasdîk olunur makūlesinden olmalarıyla bi’t-taleb mezbûrân İstirati ve Yuvan’a ba‘de’t-tahlîfi’ş-şer‘î müdde‘î-i mezbûr Mehmed merkūmâna bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 29 Safer sene 1163