Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 460 Hüküm no: 611 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Sinado v. Yorgaki’nin, nikahlı eşi Saltana bt. Trandafil’i kendi evine götürmeye engel olan Saltana’nın vekili Anastaş, halası Sünbüle, vasîsi Kostantin ve nâzırı Yorgi’nin yaptıkları müdahaleden menedildikleri Ma‘rûz Bakkāl tâifesinden olup arzuhâl eden Sinado v. Yorgaki nâm zimmî meclis-i şer‘-i enverde derûn-ı arzuhâlde mezkûreti’l-ism olup İstanbul’da Altımermer kurbünde mütemekkine Saltana bt. Trandafil nâm Nasrâniye-i bikr-i bâliğanın hâl-i sıgārında vasîsi ve nâzırı olup Halil Çavuş kulları mübâşeretiyle ihzâr ettirdiği Kalpakcı Kostantin v. Yorgi ve Bakkāl Yorgi v. Manol nâm zimmîler muvâcehelerinde bikr-i bâliğa-i mesfûrenin vekîli Anastaş v. Yorgi nâm zimmî ile li-ümmin hâletesi Sünbüle bt. Zoli nâm Nasrâniye hâzıra oldukları hâlde bundan akdem hâzır-ı mersûm Anastaş zimmî vekâleten vasîsi Kostantin ve nâzırı Yorgi zimmîlerin re’y ve ma‘rifetleriyle mesfûre Saltana Nasrâniye’yi re’yimiz üzere bana akd ve tezvîc ettiklerinde ben dahi vech-i muharrer üzere tezevvüc ve kabûl etmişidim hâlâ zevcem mesfûreyi menzilime götürmek murâd eylediğimde mesfûrân Kostantin ve Yorgi zevcem mesfûreyi vermeyip menzillerinde ihtifâ ve mümâna‘at etmeleriyle zevcem mesfûre Saltana’yı bana teslîme mesfûrâna tenbîh olunmak matlûbumdur deyü ba‘de’d-da‘vâ ve’l-istintâk mesfûrân Kostantin ve Yorgi ile vekîl-i mersûm Anastaş ve hâzıra-i mersûme Sünbüle Nasrâniye kazıyye müdde‘î-i mesfûrun takrîr-i müdde‘âsı üzere olup mesfûre zevce-i menkûhası olduğunu herbiri ikrâr ve i‘tirâf ettikden sonra mesfûrân Kostantin ve Yorgi târih-i i‘lâmdan beşinci ahad günü müdde‘î-i mesfûr Sinado zimmî menziline götürmek için zevcesi mesfûre Saltana’yı teslîme ta‘ahhüd eylediklerinde ol dahi râzı olup bu vechile kat‘-ı nizâ‘ eyledikleri Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 3 Rebî‘ülevvel sene 1163