Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 483 Hüküm no: 648 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail, Hasan, Ali ve Mustafa’nın peynircilik ticaretinde ortak oldukları Küçük Mehmed b. Ali ile olan hesapları görülüp sulh olup birbirlerinin zimmetlerini ibra ettikleri, ortaklarına kalan borcunu ödemesi için de Küçük Mehmed’e tenbih yapıldığı Ma‘rûz İstanbul’da Tahtakale kurbünde Katır Hanı’nda sâkin arzuhâl sahibi İsmail b. Hüseyin ve es-Seyyid el-Hâc Hasan b. es-Seyyid Abdülkadir ve Ali b. Cafer ile kendi nefsinden asıl ve gāib ani’l-meclis es-Seyyid Mustafa b. Ahmed tarafından zikri âtî husûsa vekîl olduğu mezbûrân İsmail ve es-Seyyid el-Hâc Hasan ve Ali şehâdetleriyle sâbit olan İbrahim b. el-Hâc Ali meclis-i şer‘de derûn-ı arzuhâlde mezkûr sâbıkā şerîkleri Küçük Mehmed b. Ali muvâcehesinde bizler mezbûr Küçük Mehmed ile mukaddemâ bin yüz altmış iki senesi Zilhicce’si gurresinden târih-i i‘lâm senesi Rebî‘ülâhir gurresine gelince dört ayda peynircilik ticâretinden şirket-i vücûh ile şerîkler olup peynir ticâretinden nes’eten iştirâ eylediğimiz peynirleri herbirimiz âhara bey‘ ve hâsıl olan akçelerini mezbûr Küçük Mehmed kabz-ı malımız olmağla götürüp teslîm ederdik hâlâ fesh-i akd-i şirket edip beynimizde cereyân eden ahz u i‘tâyı hesâb eylediğimizde müddet-i mezkûrede ticâretimizden kırk dört bin akçe hâsıl olmuşidi deyü meblağ-ı mezbûrdan hisselerimize isâbet eden yedişer bin üç yüz otuz üçer akçeyi taleb ve da‘vâya tesâddî eylediğimizde ol dahi şirket-i mezkûreyi ve müddet-i mezkûrede hâsıl olan fâiz ancak on üç bin iki yüz akçedir deyü ikrâr ve i‘tirâf edip ziyâdeyi inkâr etmekle beynimizde ba‘de’l-münâza‘a bâ-vesâtet-i muslihîn herbirimize mezbûr Küçük Mehmed dörder bin akçeden cem‘an yirmi bin akçe vermek üzere mezbûr Küçük Mehmed ile bizi sulh eylediklerinde biz dahi sulh-ı mezbûru ba‘de’l-kabûl mukaddemâ şirketimiz hâlinde bazı mesârifimize sarf için mezbûr Küçük Mehmed’den on dört bin sekiz yüz elli sekiz akçe ahz u kabz etmişidik zimmetinde bedel-i sulhdan bâkī dokuz bin yüz kırk iki akçeden mâ‘adâ dört ayda olan şirket-i mezkûreye müte‘allika âmme-i da‘vâdan herbirimiz âharın zimmetlerini ibrâ ve ıskāt eyledik deyü olan ikrârlarını mezbûr Küçük Mehmed dahi ba‘de’t-tasdîk bedel-i sulhdan zimmetinde bâkī kalan meblağ-ı mezbûr dokuz bin yüz kırk iki akçeyi mezbûrlar taleb etmeleriyle meblağ-ı bâkīyi müdde‘ûn-ı mezbûrûna def‘ ve teslîme mezbûr Küçük Mehmed’e tenbîh olunduğu mübâşirleri Kapıkethudâsı Ali Beşe kulları ile Mahkeme-i Bâb’dan huzûr-ı âlîlerine i‘lâm olundu. Fî 3 Rebî‘ülâhir sene 1163