Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 484 Hüküm no: 650 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Kazer v. Samel’in, Dülbendci Hüsam mahallesinde arsası vakıf binası kendisine ait menzilde ikamet etmesinde mahzur görülmediğinden ikametine mani olunmaması Bâ-mühr-i hazret-i efendi Ma‘rûz Zikri âtî husûsun mahâllinde hakīkat-i hâli istihbâr ve ketb ü tahrîri’çün kıbel-i şer‘den irsâl o[lunan] Kâtib İsmail Efendi dâ‘îleri derûn-ı arzuhâlde mezkûr Dülbendci Hüsam mahallesinde fahrü’l-küttâb (…) b. Mehmed’in menziline varıp mahalle-i mezkûre imâmı Hâfız Abdullah Efendi ve ahâlîsinden Mehmed Çelebi b. Abdullah ve es-Seyyid Süleyman Çavuş ve Osman ve Mustafa Ağa ve Feyzullah Ağa ve Molla Salih ve Âtıf Mehmed Efendi ve Basmacılar kethudâsı Ahmed Çelebi ve el-Hâc Süleyman ve el-Hâc Ömer ve civârında olan Kâtib Kasım mahallesi imâmı Mustafa Efendi ve Nişancı-ı Atîk mahallesi imâmı el-Hâc Mehmed Efendi ve Kürkçübaşı Süleyman Ağa mahallesi imâmı Mahmud efendi ve ahâlîlerinden Müezzin Mehmed Halîfe ve es-Seyyid Mustafa ve Mehmed Ağa ve diğer Mehmed Ağa ve Molla Hasan ve Ahmed Beşe ve el-Hâc İbrahim ve Başçavuş Osman ve es-Seyyid Hasan Ağa ve Mehmed ve Salih Çelebi ve Ahmet Çorbacı ve İsmail Ağa ve el-Hâc Mustafa ve es-Seyyid Mustafa ve Hâfız Süleyman Efendi ve Berber Ahmed Çelebi Attar Mehmed ve el-Hâc Mehmed ve Mustafa Çelebi ve Mehmed Efendi ve sâir cerîdede mastûrü’l-esâ[mî] elli neferden mütecâviz kimesneler huzûrlarında akd-i meclis-i şer‘-i nebevî eyledikde sahib-i arzuhâl sarrâf tâifesinden Kazer v. Samel nâm zimmî meclis-i ma‘kūd-ı mezkûrda işbu akd-i meclis olunan <> menzilin civârında vâki‘ etrâfı Kilârî Ahmed ve müteehhilîn odaları ve Papa Manuk menzilleri ve tarîk-ı âm ile mahdûd arsası Ece Bey Vakfı’ndan senevî iki yüz akçe mukāta‘alı ve binâsı mülk ma‘lûmü’l-müştemilât menzil işbu yedimde olan hüccet-i şer‘iye mûcebince mülk-i müşterâm olup ve mukaddemâ dahi <> işbu atîk ve müte‘a[ddid] hüccet-i şer‘iyeler mûceblerince menzil-i mezkûra kefere mâlik ve nice zaman sâkin olmuşlar ve menzil-i mezkûr mescid-i şerîfe ba‘îd ve mâ-beyninde on beşden mütecâviz kefere menzilleri olduğundan bir vechile taklîl-i cemâ‘ate dahi bâdî olmamağla hakīkat-i hâl müşâhede ve mu‘âyene ve huzzâr-ı Müslimînden istihbâ[r] olunup menzil-i mezkûrda ben sâkin olmak murâd etmemle bi-gayr-ı vech-i şer‘î süknâma mümâna‘at olunmamak bâbında kıbel-i şer‘den i‘lâm olunmak matlûbumdur deyü takrîr-i meşrûhuna mutâbık hücec-i şer‘iye-i müte‘addide ibrâz eyledikde gıbbe’l-istihbâr fi’l-hakīka menzil-i mezkûr mukaddemâ kefere mâlik ve nice zaman sâkin olduklarını huzzâr-ı Müslimîn bi-ecmâ‘ihim ba‘de’l-ihbâr menzil-i mezkûr mescid-i şerîfe ba‘îd ve mâ-beynin[de] on beşden mütecâviz hâlâ kefere menzilleri olup mesfûrun sâkin olması bir vechile taklîl-i cemâ‘ate bâdî olmayacağına icmâ‘ ve ittifâk eylediklerini mevlânâ-yı mezbûr mahâllinde ketb ü tahrîr ve ma‘an ba‘s olunan ümenâ-i şer‘le gelip alâ-vukū‘ihî inhâ ve takrîr etmeğin mesfûr Kazer zimmînin menzil-i mezkûrda sâkin olması mugāyir-i şer‘-i şerîf olmadığından mesfûr Kazer zimmînin menzil-i mezkûrda sâkin olmasına mümâna‘at olunmamak üzere emr-i âlîşân sudûrunu istid‘â ve istirhâm eylediği ma‘lûm-ı devletleri buyruldukda emr ü fermân hazret-i veliyyü’l-emrindir. Fî 23 min-şehri Rebî‘ülevvel sene 1163