Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 486 Hüküm no: 651 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in, babasının ölmeden önce Mehmed Beşe b. Hüseyin’le müşterek sahibi oldukları vakıf evin yarısının kendisine satılması talebiyle Mehmed Beşe’ye açtığı davada haksız bulunup davasının reddedildiği Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Âişe bt. İbrahim nâm hatun meclis-i şer‘-i hatîrde ashâb-ı hayrâtdan merhûm Desterecizâde Mehmed Efendi Vakfı’na bi’l-meşrûta mütevelliye olan umdetü’l-muhadderât Hadîce Hanım bt. el-merhûm Mustafa Paşa tarafından kāimmakāmı ve vekîli Zülfikar Çelebi b. Abdurrahim hazır olduğu hâlde vakf-ı mezkûr müstagallâtından zikri âtî vakıf menzile bi’l-icâreteyn vaz‘-ı yedi sâbit olan Mehmed Beşe b. Hüseyin nâm kimesne muvâcehesinde babam müteveffâ-yı mezbûr İbrahim b. İsmail hâl-i hayatında bin yüz elli dört senesi Receb-i şerîf’inde li-ebeveyn karındaşı diğer Mehmed Çelebi ile vakf-ı mezkûrdan bi’l-münâsafa bi’l-icâreteyn mutasarrıf oldukları mahrûse-i Galata müzâfâtından kasaba-i Beşiktaş’da Süleymâniye mahallesinde vâki‘ etrâf-ı erba‘adan imâm meşrûtası vakıf menzil ve yine mezbûr Mehmed Beşe’nin âhar vakıf menzili ve Vişnezâde Vakfı odalar ve el-Hâc Mustafa Vakfı menzil ve Âişe Hatun mülkü ve Pabuccu Mustafa Çelebi veresesi mülkleri ve tarîk-ı âm ile mahdûd ma‘lûmü’l-müştemilât vakıf menzillerini mezbûr Mehmed Beşe’ye zimmetlerinde deynleri olan yüz yetmiş guruş mukābelesinde bâ-ma‘rifet-i mütevellî kat‘ā ferâğ ve tefvîz ve teslîm etmişler idi lâkin ferâğ-ı mezkûr kat‘î olmayıp ferâğ bi’l-vefâ olmağla vakf-ı menzil-i mahdûd-ı mezkûrun nısfîsi hasbe’l-kānûn babam mezbûr İbrahim’in fevtinden bana intikāl etmekle mezbûr Mehmed Beşe’ye suâl olunup bedel-i makbûzun nısfı olan seksen beş guruşu yedimden ahz ve menzil-i mahdûd-ı mezkûrun nısfını bana izn-i mütevellî ile ferâğına tenbîh olunmak matlûbumdur deyü ba‘de’d-da‘vâ ve’s-suâl mezbûr Mehmed Beşe cevâbında vakf-ı menzil-i mahdûd-ı mezkûru müdde‘iye-i merkūme Âişe’nin babası müteveffâ-yı mezbûr hâl-i hayatında [85a] ve târih-i mezkûrda li-ebeveyn karındaşı Mehmed ile yüz yetmiş guruş bedel-i makbûz mukābelesinde bâ-ma‘rifet-i mütevellî kendiye ferâğ ve tefvîz ve teslîm eylediklerini ikrâr lâkin ferâğ-ı mezkûr kat‘iyen olduğundan mâ‘adâ müdde‘iye-i merkūme Âişe Hatun işbu yedimde olan sulh hücceti nâtık olduğu üzere bin yüz altmış senesi Saferü’l-hayr’ın beşinci günü mahrûse-i Galata’da Bâb nâibi müderrisîn-i kirâmdan Muradzâde es-Seyyid Ahmed Efendi huzûrunda nısf-ı menzil-i mezkûru yine benden vech-i meşrûh üzere da‘vâ ve tavassut-ı muslihîn ile otuz guruş bedel-i makbûza benimle sulh olup husûs-ı ferâğ-ı mezbûra [ve] menzil-i mezkûra ve bedeline müte‘allika âmme-i da‘vâdan benim zimmetimi ibrâ ve ıskāt etmişidi deyü bir kıt‘a musâlaha hüccet-i şer‘iye ibrâz ile ba‘de’d-def‘ ve’l-inkâr mezbûr Mehmed Beşe def‘-i mezkûrunu lede’t-tezkiye adâletleri zâhir olan İmâm Mustafa Efendi b. Muslihiddin ve el-Hâc Hasan b. Mehmed ve Beyrakdâr İbrahim Beşe b. Mustafa nâm kimesneler şehâdetleriyle müdde‘iye-i merkūme Âişe Hatun muvâcehesinde vech-i şer‘î [üzere] isbât etmeğin mûcebince müdde‘iye-i merkūme Âişe Hatun nısf-ı menzil-i mezkûr mutâlebesiyle mezbûr Mehmed Beşe’ye bî-vech-i şer‘î mu‘ârazadan men‘ olunduğu Bâb Mahkemesi’nden huzûr-ı âlîlerine i‘lâm olundu. Fî 4 şehri Rebî‘ülâhir sene 1163