Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 501 Hüküm no: 674 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hür olduğunu iddia eden Emine bt. Abdullah’ın cariyesi Safiye’nin hürriyetini ispat edemediği Ma‘rûz Sâbıkā rıkka inkıyâdını mu‘terife olmağla kıbel-i şer‘-i enverden ber-vech-i âtî da‘vâya me’zûne olan orta boylu açık kara kaşlı kara gözlü Zeliha nâm-ı diğer Safiye meclis-i şer‘de kendiye vâzı‘atü’l-yed olan sahibe-i arzuhâl Emine bt. Abdullah nâm hatun muvâcehesinde ben vilâyet-i Anadolu’da medîne-i Kars’da içkal‘a kurbünde sâkin hürrü’l-asl Osman b. Derviş nâm kimesnenin firâşından hâsıla ve hürretü’l-asl zevce-i menkûhası Fâtıma bt. Abdullah nâm hatundan mütevellide olup kat‘a bana ve ebeveynime rık târî olmamış iken mezbûre Emine Hatun hâlâ bana rakīkası olmak üzere bi-gayr-ı hakkın vaz‘-ı yed etmekle suâl olunup <> sebîlim tahliye olunmak matlûbumdur deyü ba‘de’d-da‘vâ ve’s-suâl mezbûre Emine Hatun cevâbında mevsûfe-i mezbûre Safiye’yi târih-i i‘lâmdan bir buçuk sene mukaddem Unkapanı’nda sâkin Kantarcıoğlu Mehmed nâm kimesneden Gürciyyetü’l-asl yedinde câriye-i memlûkesi olmak üzere dört yüz otuz guruş semen-i medfû‘a ve makbûza iştirâ edip câriye-i memlûkem olmak üzere vaz‘-ı yed ederim deyü vaz‘-ı yedini ikrâr lâkin mevsûfe-i mezbûrenin hürriyetini ba‘de’l-inkâr mevsûfe-i mezbûre müdde‘âsını isbât için ba‘de’l-istimhâl ve’l-imhâl müddet-i mehl tamam olup ityân-ı beyyineden ızhâr-ı acz edip tahlîfe dahi tâlibe olmamağla mâlikesi mezbûre Emine Hatun’a rıkkıyete inkıyâdına câriye-i mevsûfe-i mezbûre Safiye’ye tenbîh olunduğu Bâb’dan huzûr-ı âlîlerine i‘lâm olundu. Fî 16 Rebî‘ülâhir sene 1163