Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 500 Hüküm no: 673 Orijinal metin no: [87b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suzenici esnafının şikayetleri üzerine nizama aykırı olarak çürük ve eski kumaş işleyen Acem İsmail’e nizamlarına uygun kumaş işlemesi için yapılan tenbih Bâ-mühr-i hazret-i efendi Ma‘rûz Ashâb-ı arzuhâl sûzenîci esnâfının kethudâları Ali Çelebi ve yiğitbaşıları el-Hâc Mustafa ve ustalardan Mehmed Çelebi ve el-Hâc Mustafa ve Mustafa Çelebi ve Hüseyin Çelebi ve es-Seyyid Mehmed ve diğer es-Seyyid Mehmed ve Ömer Çelebi ve diğer Mustafa Çelebi ve Hasan Çelebi ve diğer Mustafa ve Ali Çelebi ve Süleyman Çelebi ve diğer Hasan ve Molla Hüseyin ve Molla Abdullah ve es-Seyyid Süleyman ve diğer Mustafa Çelebi ve Yusuf ve es-Seyyid Mehmed Emin ve es-Seyyid Ahmed ve zimmîlerden Agop ve Avanis ve İsayi ve Kigork ve Komidas ve Mardiros ve Mahir ve Tomas ve Bağdasar ve Avadik ve Kazer ve Tarbiyos ve Minas meclis-i şer‘de tüccâr tâifesinden derûn-ı i‘lâmda mezkûrü’l-ism Acem İsmail nâm kimesne muvâcehesinde ez-kadîm nizâmımız ibâdullâhı zarardan bey‘ ve şirâda efzâ-i nizâ‘dan hıfz için tüccâr tâifesi ve gayrileri köhne ve eski şâl ve çürük kumaşı ördürüp pîr perver olmayan hâm-dest ve san‘at-ı mezkûrede ecnebi ve nisvân tâifesi ve Yahûd ve Nasârâ mechûlü’l-ahvâl kimesnelere işletmek memnû‘âtdan olup ve bundan akdem derûn-ı arzuhâlde zikrolunduğu üzere mezbûr Acem İsmail’e ba‘de’t-tenbîh ol dahi ber-vech-i muharrer [88a] hilâf-ı nizâm hareket etmemek üzere ta‘ahhüd dahi etmiş iken yine mezbûr Acem İsmail mütenebbih olmayıp nizâm-ı kadîme mugāyir hareket eder deyü herbiri ba‘de’t-teşekkî ba‘de’l-yevm ber-vech-i muharrer eski ve çürük şâl ve kumaş işletmeyip ve ez-kadîm nizâmlarına muhâlif hareket etmemek üzere mezbûr Acel İsmail’e tenbîh olunduğu huzûr-ı âlîlerine i‘lâm olundu. Fî 14 Rebî‘ülâhir sene 1163