Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 510 Hüküm no: 691 Orijinal metin no: [89b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi, Dimitri ve diğer Dimitri’nin ortak oldukları şirketlerinden aldığı borcu ödemesi için Şerbetçi Dimitraki’ye yapılan tenbih Ma‘rûz Mahmiye-i İstanbul’da Sandal Bezistânı’nda mütemekkin sahib-i arzuhâl Kostandi v. Hani ve şerîki Dimitri v. Bendeli meclis-i şer‘de şerbetçi tâifesinden derûn-ı arzuhâlde mastûr Dimitraki v. Yorgi muvâcehesinde mezbûr Şerbetçi Dimitraki târih-i i‘lâmdan altı ay mukaddem şerîkimiz olan işbu hazır bi’l-meclis diğer Dimitri v. Anton yedinden mal-ı şirketimizden beher zirâ‘ı üçer guruşa olmak üzere iştirâ ve kabz eylediği on zirâ‘ al çuka ve on bir zirâ‘ üç rub‘ bir girih al mutallâ hatâyî semenlerinden min-haysü’l-mecmû‘ altmış dört guruş on iki para hakkımın yirmi bir guruşunu bize edâ ve teslîm edip bâkī kırk üç guruş on para mezbûr Şerbetçi Dimitraki zimmetinde kalmağla taleb ederim deyü ba‘de’d-da‘vâ ve’l-istintâk mesfûr Şerbetçi Dimitraki cevâbında mezbûrlar ancak kabzını i‘tirâf eyledikleri yirmi bir guruşluk çuka aldığını ikrâr mâ‘adâ kırk üç guruş on iki parayı inkâr etmeğin mezbûrûn Kostandi ve şerîkleri Dimitri ve diğer Dimitri müdde‘âlarını lede’t-tezkiye şehâdetleri makbûle olduğu zâhir olan bezistân erbâbından Anton v. Cani ve Luki [v.] Mikel zimmîler şehâdetleriyle merkūm Şerbetçi Dimitraki muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı mezkûr kırk üç guruş on iki parayı müdde‘ûn-ı merkūmûna edâ ve teslîmle mezbûr Şerbetçi Dimitraki zimmîye tenbîh olunduğu Mahkeme-i Bâb’dan mübâşirleri Abdullah Çavuş ile huzûr-ı âlîlerine i‘lâm olundu. Fî 20 şehr-i Rebî‘ülevvel sene 1163