Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 511 Hüküm no: 692 Orijinal metin no: [89b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marina bt. Hristo’nun kendisini hamamda dövdükleri iddiasıyla Gül bt. Gavril ile kızları Zoli ve Elina’ya açtıkları davada sulh olduğu Ma‘rûz Şahsı ta‘rîf-i şer‘î ile mu‘arrefe olan sahibe-i arzuhâl Marina bt. Hristo nâm Nasrâniye meclis-i şer‘-i enverde derûn-ı arzuhâlde mezkûreti’l-ism olup şahsı kezâlik ta‘rîf-i şer‘î ile mu‘arrefe olan Gül bt. Gavrail nâm Nasrâniye ile kebîre-i sadriye kızları Zoli ve Elina bintey Pavlo nâm Nasrâniyelerin taraflarından husûs-ı câi’z-zikri tasdîka vekîlleri olduğu şahs-ı mesfûretânı bi’l-ma‘rifeti’ş-şer‘iye ârifân İstefan v. Dimo ve Pavlo v. Panayot nâm zimmîler şehâdetleriyle ber-vech-i şer‘î sâbit olan Andreya v. Pavlo nâm zimmî muvâcehelerinde târih-i i‘lâmdan dört gün mukaddem mesfûre Gül ile kızları müvekkiletân-ı mersûmetân Zoli ve Elina Nasrâniyeler mahmiye-i merkūmede Kadırga Limanı kurbünde vâki‘ avratlar hamamında bi-gayr-ı hakkın yumruklarıyla beni darb ve kara bere etmeleriyle mesfûrâtdan mûceb-i şer‘îsini taleb ederim deyü da‘vâ sadedinde olduğumda onlar dahi inkâr etmeleriyle beynimizde ba‘de vukū‘ı’l-münâza‘a bâ-tavassut-ı muslihîn mesfûre Gül ve kızları müvekkiletân-ı mersûmetân Zoli ve Elina Nasrâniyeler ile da‘vâ-yı mezbûremden beş zencirli altın bedel-i makbûza sulh olup darb-ı mezkûrlarına ve mâ-yuhdesü-minhe müte‘allika âmme-i da‘vâdan ben mesfûrât Gül ve Zoli ve Elina Nasrâniyelerin zimmetlerini ibrâ ve ıskāt eylediğimde onlar dahi bana medfû‘ları olan beş altına müte‘allika âmme-i da‘vâdan benim zimmetimi ibrâ ve ıskāt eylediklerinde herbirimiz âharın ibrâsını kabûl ile kat‘-ı nizâ‘ eyledik deyü olan ikrârını mesfûre Gül Nasrâniye asâleten ve vekîl-i mesfûr Andreya dahi vekâleten tasdîk eyledikleri Mahkeme-i Bâb’dan huzûr-ı âlîlerine i‘lâm olundu. Fî 25 Rebî‘ülâhir sene 1163