Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 523 Hüküm no: 711 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci Mehmed Beşe b. Mustafa’nın kendisini darp edip bazı hayvanlarını haksız yere aldığı iddiasıyla Bostancı Mustafa Bey b. Hacı Ali’ye açtığı davayı ispat edemediği Ma‘rûz Fi’l-asl vilâyet-i Anadolu’da Ankara sancağında Şorba kazâsına tâbi‘ Baş karye ahâlîsinden olup Dergâh-ı âlî cebecilerinin otuz üçüncü bölüğün yoldaşlarından Mehmed Beşe b. Mustafa Bâb Mahkemesi’nde Kullukçu İbr[ahim] Beşe mübâşeretiyle meclis-i şer‘-i envere ihzâr ettirdiği Mustafa Bey b. el-Hâc Ali nâm bostânî muvâcehesinde târih-i i‘lâmdan bir sene mukaddem mezbûr Mustafa Bey karye-i merkūmede subaşı vekîli iken bi-gayr-ı hakkın beni ahz ve darb eyledikden mâ‘adâ malımdan mecmû‘u altmış guruş kıymetli bir inek ve bir öküz ve bir merkeb ve beş re‘s ganemimi ahz u gasb etmekle darb-ı mezkûrun mûceb-i şer‘îsi ile mârrü’z-zikr inek ve öküz ve merkeb ve ganemiminin bi-tarîkı’d-damân kıymetlerini mezbûr Mustafa Bey’den taleb ederim deyü ba‘de’d-da‘vâ ve’l-inkâr müdde‘î-i merkūm Mehmed Beşe ber-vech-i muharrer müdde‘âsını bir vechile beyâna kādir olmayıp bi’t-taleb mezbûr Mustafa Bey’e vech-i şer‘î üzere yemîn verilmeğin mûcebiyle müdde‘î-i merkūm Mehmed Beşe bilâ-beyyine-i âdile mezbûr Mustafa Bey’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 5 Cemâziyelevvel sene 1163