Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 522 Hüküm no: 710 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed’in, komşusu İsmihan Hatun’un evinin pencere havalelerinin kendi evinin nisa odalarına nâzır olduğu iddiasıyla açtığı davada İsmihan Hatun’un pencere havalelerini kapatma sözü vermesiyle sulh oldukları Bâ-mühr-i hazret-i efendi Ma‘rûz Fermân-ı âlîlerine imtisâlen cânib-i şer‘den irsâl olunan keşif nâibimiz efendi dâ‘îleri hâssa mi‘mâr hulefâsından el-Hâc Süleyman ve Hüseyin ile arzuhâlde [mastûr] Hızır Bey mahallesinde vâki‘ Tutlu Çeşme ittisâlinde sahib-i arzuhâl el-Hâc Mehmed’in mülkü ve arzuhâlde ismi mezkûre câr-ı mülâsıkı İsmihan Hatun’un mülkü olan menzillere varıp münâza‘un-fîh havâle zararını ba‘de’l-mu‘âyene cerîdede isimleri mazbût cemâ‘at-i Müslimîn huzûrlarında akd eylediği meclis-i şer‘de mezbûr el-Hâc Mehmed zâtı ta‘rîf-i şer‘î ile mu‘arrefe olan mezbûre İsmihan Hatun muvâcehesinde mezbûre İsmihan Hatun işbu binâ eylediği menzilinin çeşme-i mezkûr cânibine vüstâ ve ulyâda üçer pencereleri iki bâb odasının altı aded pencerelerinden benim menzilimde vüstâ ve ulyâda makarr-ı nisvân olan iki bâb odalarıma havâlesi olup muhterik olmazdan mukaddem zikrolunan altı aded pencerelerin havâlesi olmuş iken el-hâletü hâzihî binâlarımızın akdemiyeti zâhire olmağla çeşme-i mezkûr cânibine menzilinin sofalarından vüstâ ve ulyâda iki aded pencere dahi ihdâs etmekle cem‘an sekiz aded pencerelerinin bana havâle ve zarar-bîni olmağla keşif ve mu‘âyene olunduğu üzere zikrolunan altı aded pencerelerin havâlesini tahta ile kadîmîsi üzere def‘ ve ihdâs eylediği mârrü’z-zikr iki aded sofa pencelerini dahi sed eylemek üzere tenbîh matlûbumdur deyü da‘vâ ve müdde‘âmı İmâm Hüseyin Efendi b. Mehmed ve Süleyman Çelebi b. Ömer şehâdetleriyle isbât sadedinde olup beynimizde ba‘de vukū‘ı’l-münâza‘a bâ-vesâtet-i muslihîn mezbûre İsmihan Hatun menzilinin ulyâ ve vüstâsında ihdâs eylediği iki aded sofa pencelerinden vüstâda olan bir aded pencereli duvar ile sed ve üzerine ziyâ için yedi duvar camı vaz‘ ve bâkī yedi aded pencerelerin mezbûr el-Hâc Mehmed’e havâle-i zararını tahta sütre ile def‘ etmek üzere mezbûre İsmihan Hatun ta‘ahhüd ve bu minvâl üzere herbirimiz râzı ve kat‘-ı nizâ‘ eyledik dediğini mezbûre İsmihan Hatun tasdîk eylediğini mezbûr dâ‘îleri mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ ve takrîr eylediği huzûr-ı âlîlerine i‘lâm olundu. Fî 28 şehri Rebî‘ülâhir sene 1163