Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 524 Hüküm no: 714 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yavaşça Şahin mahallesi ahalisinin kendilerinden emniyetleri olmadıklarını şikayet ettikleri Ahmed b. Mehmed ile kızı Hatice’nin bir daha ahalinin şikayetine sebep olacak tavır ve hareketler yapmama sözü vermeleriyle sulh oldukları Ma‘rûz İstanbul’da Uzun Çarşı kurbünde Yavaşça Şahin mahallesi ahâlîsinden A‘mâ Hâfız Hüseyin meclis-i şer‘de yine mahalle-i mezbûre ahâlîsinden derûn-ı arzuhâlde mezkûr el-Hâc Ahmed b. Hacı Mehmed muvâcehesinde yine mahalle-i mezbûre imâmı Ali Efendi ve müezzini el-Hâc Abdullah ve ahâlîsinden el-Hâc Said ve Mehmed Çelebi ve el-Hâc Mustafa ve ittisâlinde vâki‘ Samanveren mahallesi imâmı el-Hâc Mustafa Efendi ve Müezzin el-Hâc Yakub ve ahâlîsinden el-Hâc Ahmed ve Mehmed ve el-Hâc Mehmed ve el-Hâc Osman ve el-Hâc Musa hazır oldukları hâlde mahalle-i mezbûrede sâkin olduğum menzilimin bir tarafında mezbûr el-Hâc Ahmed sâkin ve bir tarafında kebîre kızı gāibetü ani’l-meclis Hadîce nâm hatun sâkine olmağla mezbûr el-Hâc Ahmed menzilinin tavanını delip benim tavanımın üzerinden kızı mezbûrenin menziline dâimâ mürûr eylediğinden mâ‘adâ mezbûr el-Hâc Ahmed ve kızı mezbûre Hadîce bana ve gerek işbu hâzırûn bi’l-meclis ahâlîye dâimâ hilâf-ı şer‘ itâleden hâlî olmayıp mezbûrândan bir vechile emn ü rahatımız yokdur deyü mezbûr A‘mâ Hâfız Hüseyin ve ahâlîden herbiri ba‘de’t-teşekkî mezbûr el-Hâc Ahmed mârrü’z-zikr tavanının sakbını seddedip gerek kendi ve gerek kızı gāibe-i mezbûre Hadîce Hatun dahi ahâlî-i mezkûrûna hilâf-ı şer‘ itâle etmemek üzere kendi ta‘ahhüd ve kızı mezbûreye dahi tekeffül eylediğinden sonra ba‘de’l-yevm ber-vech-i muharrer ahâlî-i mezkûrûna hilâf-ı şer‘-i şerîf itâle edersem kızım mezbûre Hadîce ile ma‘an mahalle-i mezkûreden hurûca müte‘ahhid olmağla mezbûrlar dahi râzılar olup bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 5 Cemâziyelevvel sene 1163