Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 525 Hüküm no: 715 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şumnulu Lika bt. Dimitri’nin hemşehrîleri Papa Petre, Liko, Yani, Papa Yorgi ve Todori’ye alacak iddiasıyla açtığı davayı ispat edemediği Bâ-mühr-i hazret-i efendi Ma‘rûz Fi’l-asl vilâyet-i Rumeli’de medîne-i Şumnu mütemekkinelerinden olup hâlâ İstanbul’da müsâfereten mütemekkine ve şahsı ta‘rîf-i şer‘î ile mu‘arrefe Lika bt. Dimitri nâm Nasrâniye dîvân-ı âlîlerinde ma‘kūd meclis-i şer‘de yine medîne-i Şumnu re‘âyâlarından olup kezâlik İstanbul’da müsâfiren mütemekkinler olan Papa Petre v. Dragani ve Liko v. Lala nâm zimmîler ile terâfu‘larında târih-i i‘lâmdan dokuz sene mukaddem medîne-i Şumnu’da mütemekkine olduğum Çukur mahallede kendi menzilimde işbu mesfûrân Papa Petre ve Liko zimmîlere ve gāibûn ani’l-beled Yani v. İstemat ve Papa Yorgi ve Jeke oğlu Todori nâm zimmîlere malımdan üç bin guruş ikrâz ve teslîm edip onlar dahi ber-minvâl-i muharrer istikrâz ve kabz ve istihlâk edip meblağ-ı mezkûr ol vechile zimmetlerinde hakkım olmağın taleb ederim deyü ba‘de’d-da‘vâ ve’s-suâl ve’l-inkâr müdde‘iye-i merkūme müdde‘âsını beyân için bi’d-defa‘ât ba‘de’l-istimhâl ve’l-imhâli’ş-şer‘î müdde‘iye-i merkūme Lika Nasrâniye müdde‘âsına bir vechile beyyine-i âdile ikāmet edemeyip tâlibe-i tahlîf dahi olmadığından mâ‘adâ müdde‘iye-i merkūme müdde‘âsını te’yîd için mesned olmak üzere ibrâz eylediği bir kıt‘a deyn temessüğü bundan esbak hâlik olan Şumnu Metrepolidi Barfini Râhib’in ismini ve mührünü hâvî olup ve arzuhâlde tahrîr eylediği üzere tasvîr-i müdde‘âsı bâlâda tastîr olunan sûret-i müdde‘â-bih külliyyen muhâlif olduğundan müdde‘iye-i merkūmenin müdde‘âsında şâibe-i tezvîr dahi fehm olunmağla merkūme Lika Nasrâniye mesfûrân zimmîlere bilâ-beyyine-i âdile bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 Cumâdelûlâ sene 1163