Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 535 Hüküm no: 732 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Mehmed’den Seyyid Abdullah Paşa’nın hizmetine almak sözü ile para alan Berber Ömer Çelebi b. Ali’nin aldığı parayı iade etmesi Ma‘rûz Sahib-i arzuhâl Abdullah Çelebi b. Mehmed Berber Ömer Çelebi b. Ali ile Bâb Mahkemesi’nde terâfu‘larında mezbûr Ömer Çelebi üç sene mukaddem seni sadr-ı sâbık es-Seyyid Abdullah Paşa hazretlerine intisâb etdireyim deyü hâlâ hâssa terzibaşısı olan el-Hâc İsmail Ağa yediyle bi-tarîkı’r-rüşve yüz otuz guruş vermişidim husûs-ı mezkûr husûl-pezîr olmayıp meblağ-ı mezkûr zimmetinde kalmağla hâlâ meblağ-ı mezkûru mezbûrdan taleb ederim deyü da‘vâ mezbûr Berber Ömer Çelebi cevâbında fi’l-hakīka mezbûr Abdullah Çelebi’nin malından mezbûr İsmail Ağa yedinden yüz otuz guruş ahzını ikrâr lâkin mukaddemâ mezbûr Abdullah Çelebi zimmetinde bir altın sâ‘at bahâsından yüz on guruş ve cihet-i karzdan yirmi guruş ki min-haysü’l-mecmû‘ yüz otuz guruş alacağım olmağla meblağ-ı mezkûru mezbûrdan bi-hakkın almışidim ve birbirimizi ibrâ dahi etmişidik deyü ba‘de’d-def‘ ve’l-inkâr merkūm Berber Ömer Çelebi def‘-i mezkûrunu bir vechile beyâna kādir olmayıp mezbûr Abdullah Çelebi bi’t-taleb ba‘de’t-tahlîfi’ş-şer‘î mezbûr Berber Ömer Çelebi’nin ikrârı mûcebince meblağ-ı mezkûr yüz otuz guruşu mezbûr Abdullah Çelebi’ye merkūm Derzibaşı el-Hâc İsmail Ağa hazır olduğu hâlde edâya merkūm Berber Ömer Çelebi’ye tenbîh olunduğu huzûr-ı âlîlerine i‘lâm olundu. Fî 14 Cemâziyelevvel sene 1163